Comision di accion ta splica pakico a reactiva killcage temporalmente. E comision di accion encarga cu Plan Nacional, ta trahando duro pa pronto por anuncia e apertura di e Centro di Control di Cacho. Manera conoci, un di e prome pasonan di e Plan Nacional cu ta atende cu e problematica di cacho na Aruba, ta encera cu e ‘killcage’ na wayaca lo wordo transforma pa por funciona como un “bewaarplaats” manera stipula den e Ley di Cacho y lo wordo inaugura como Centro di Control di Cacho (CCC).
Doño iresponsabel
Apesar cu e luga tawata cera pa por construi, hendenan cu no kier a asumi nan responsabilidad pa cu nan mascota y tabata keda trece bestia na e sitio, lagando nan atras sea den caha dilanti e shelter na banda, of mara na cadena, of djis los riba caya. Algun hende te hasta tabata tira bestia over di e cura halto sin importa si e mascota kibra un weso of no.
Pa purba preveni molester door di e mascotanan indica aki, “Aruba Animal Shelter” a tuma e iniciativa pa hiba e animalnan cu nan no a logra hinca bou di nan mesun cuido of bou cuido di otro fundacion, na veterinarionan priva pa pone nan drumi, cual gasto tawata cay riba nan.
Tur esaki a pone cu e actiecomité a haci un peticion na Servicio Veterinario pa resumi cu e tarea di pone bestia indesea drumi pa un periodo cortico. Esaki te ora e luga por wordo inaugura como CCC.
Disculpa
Actiecomité mes momento a pidi disculpa cu pa motibo di COVID-19 no a logra inaugura e CCC ainda pero kier sigura Aruba henter cu nan ta haciendo nan maximo esfuerso pa anuncia e apertura pronto. Alabes kier pidi comunidad cu tin e necesidad di haci uzo di e ‘killcage’ pa tene cuenta cu e orario y no hiba nan mascota indesea durante oranan cu e luga ta cera.
