Doño di TikTok a bisa diahuebs cu a aplica pa un licencia di exportacion di tecnologia Chines, mientras ta purba di completa un acuerdo cu Oracle y Walmart pa mantene operacion di e app popular na Merca.
Beijing a reforsa control riba exportacion di tecnologia luna pasa den un esfuerso pa haya bentaha riba Washington su intento pa forsa un benta di TikTok na doñonan Mericano. Cas Blanco ta bisa cu e servicio di video ta un riesgo pa seguridad pasobra e informacion personal di su miyones di usuario Mericano por wordo entrega na autoridadnan Chines.
Presidente Donald Trump a bisa e siman aki cu e lo aproba un acuerdo proponi, den cual Oracle Corp. y Walmart Inc. inicialmente lo ta doño di 20% combina di un entidad Mericano nobo, TikTok Global. Trump a bisa cu Oracle mester tin ‘control total’.
ByteDance a bisa cu a aplica na e Bureau Municipal di Comercio na Beijing pa un licencia di exportacion y ta wardando un contesta. E declaracion di un solo frase no a duna mas detaye.
Autoridadnan Chines no a indica si nan lo bay di acuerdo na un transferencia di tecnologia. Pero corant oficial a critica e acuerdo proponi e siman aki, como termento y extorsion. “China no tin motibo pa duna luz berde na un acuerdo asina, cual ta sushi y inhusto”, segun e corant China Daily a bisa diaranson.
Diahuebs, ministerio di Relacion Exterior a bisa cu China ‘lo tuma e medidanan necesario’ pa salvaguardia su companianan, pero no a duna indicacion ki stapnan por tuma pa afecta destino di TikTok na Merca. Un vocero di e ministerio, Wang Wenbin, a haci un yamado pa Washington ‘respeta e principionan di economia di mercado y competencia husto’, y ‘provee un ambiente di negoshi habri, husto y no discriminatorio’ pa companianan stranhero.
