(CuraçaoChronicle) – Doño di casino basa na Sint Maarten, Francesco Corallo, tambe conoci como ‘King of the Slots’, ta demandando compania di spyware Israeli, NSO Group, y entidadnan relaciona pa supuestamente conspira cu su pais natal Italia y Hulanda como parti di loke e ta bisa ta un campaña di persecucion durante varios aña cu a conduci na su enhuiciamento inhusto pa fraude di impuesto, soborno y labamento di placa.

A traves di su abogado, Gilberto M. Garcia, Corallo a lansa un accion civil contra Berkeley Research Group LLC, NSO Group Technologies Limited y Q Cyber Technologies Limited den Corte Mericano pa Districto di New Jersey. E declaracion preliminar di Corallo na e corte a keda entrega dia 7 di januari 2021.

E accion den corte ta busca reparacionnan contra Hulanda y Italia ya cu ambos pais lo a actua como cliente di NSO y a ‘conspira’ cu e compania en cuestion pa ‘intencionalmente hack e aparatonan Apple y sistemanan di e acusador y viola privacidad di e acusador cu nan spyware’, por lesa den e declaracion preliminar na corte.

‘Atacador patrocina pa estado’

Corallo no ta sigur cual ‘atacador patrocina pa estado’ a hack su iPhone y cuentanan di iCloud usando hermentnan di hacking di NSO, ‘pasobra e acusadonan a nenga di revela e informacion aki’, su abogado a declara den su nomber.

Asina mes, Corallo ta puntando riba tanto Italia como Hulanda como clientenan di NSO, ya cu ambos pais ‘cada un riba su mes, y conhuntamente, durante añas’ a somet’e ‘na persecucion severo y basa riba su opinionnan politico y interesnan comercial’. E ‘persecucion a manifesta den vigilancia intrusivo y ilegal’ di Corallo, su famia, socionan di negoshi y abogadonan, a declara.

Segun Corallo, deliberadamente a acus’e di ta asocia cu crimen organisa ‘y di tur sorto di actividad criminal’ den un aparente intento pa desacredita y difama su persona.

Persecucion a conduci na enhuiciamento, segun Corallo. Sinembargo, ningun di e ‘acusacionnan publico’ aki a resulta den un condena den corte di ley.

Referiendo na e hecho cu el a keda deteni den celnan totalmente inadecua na warda di polis pendiente di su extradicion na Italia, excediendo e maximo di detencion pre-huicio cu varios luna den circunstancianan teribel pa cual Corte Europeo di Derechonan Humano a condena Hulanda pa violacionnan di derechonan humano basico y tortura, awo Corallo ta teme cu e ‘persecucion y enhuiciamento’ aki a tuma forma di metodonan ilegal y extrahudicial, causando ‘stress y ansiedad inmenso’ na su persona, su famia, incluyendo su yiunan morocho na Merca, y asociadonan cercano.

Na 2016 a aresta Corallo y a extradit’e na Italia bao sospecha di labamento di placa y evasion di impuesto. E tambe ta sospecha di ta miembro di un organisacion criminal. Corallo ta kere cu su persecucion tin un naturalesa politico basa riba un concesion estatal no-exclusivo pa e red y coleccion di impuesto di mashinnan di wega di placa na Italia. “E acusador ta kere cu tanto su participacion den negoshi di concesion estatal Italiano como tambe su presencia den sociedad chikito di Sint Maarten a genera rabia di autoridadnan na ambos pais, resultando den escrutinio cada bes mas intenso y un atake contra su persona y interesnan comercial na ambos pais”, segun Garcia.

‘E grado di scrutinio di e acusador por keda demostra pa e hecho cu riba dos ocasion e supuesto influencia di e acusador riba politica di Sint Maarten a keda discuti den Parlamento Hulandes [door di ex-parlamentario di SP, Ronald van Raak – Ed.], mientras na Italia, gobierno a introduci tres ley relaciona cu negoshi di concesion, conoci como ‘leynan anti-Corallo’”, abogado di Corallo a bisa.

Industria di spyware
Segun The Washington Post, NSO group ta un lider mundial den e industria cresciente y altamente iregular di spyware priva. Corallo a describi e compania como un hacker notorio y un ‘mercenario’ cu a crea un makinaria usando malware ‘ofensivo y destructivo’ y producto- y servicionan di spyware cu a ser usa pa enfoca, ataca y haci daño na usuarionan di Apple y WhatsApp, incluyendo Corallo, kende ta doño di casino na Sint Maarten y Republica Dominicana.

 

Oficialnan di gobierno, periodista, comerciante, activista, academico y ciudadanonan rond mundo tambe a bira victima di NSO, cu a keda incorpora na Israel na 2010.

Alrededor di dia 23 di november 2021, Corallo a ricibi un notificacion di Apple avisando cu a hack su celular y cuentanan di iCloud. Segun Corallo, e spyware altamente invasivo ‘Pegasus’, a permiti autoridadnan na Hulanda pa extrae remotamente inteligencia valioso for di su aparato mobil sin su permiso. Corallo a bisa cu e hacking di su celular a causa daño di alrededor di $75mil y a resulta den entidadnan stranhero obteniendo comunicacionnan financiero, confidencial y privilegia entre su persona y otronan, incluyendo socionan di negoshi y su abogadonan.

El a alega cu e operacion di hacking ta un violacion di e US Computer Fraud and Abuse Act y a invadi su privacidad. Corallo a pidi e corte pa duna orden na NSO pa identifica tur cliente y entidad cu a paga nso y a usa su aparato pa obtene informacion personal.