Parlamentario Donny Rasmijn reuniendo cu diferente partner pa concretisa loke ta bay bira promocion y conscientisacion di e ley di prohibicion di saco di plastic. Te ainda por bisa cu faltando 4 luna prome cu prohibicion mayoria luga ta uza e saconan aki ainda.
Grupo implementacion promocion
“Mi persona cu e dos trahadonan di Gobierno ta papiando cu tur partnernan encuanto e implementacion y promocion. Nos kier pa tur partner haci promocion y siguramente mi persona como e esun cu a tuma iniciativa lo participa activamente den promocion den prensa,” Sr. Rasmijn a bisa.
Situacion
Despues cu e ley di saco di plastic a wordo pasa, Parlamento tabatin break (vacacion). Despues cu esaki a pasa, Sr. Rasmijn ta splica cu siman pasa a reuni cu dos persona cu ta yuda Sr. Rasmijn y a sostene den e proyecto aki pa haya implementacion di e ley aki y pa e por tuma luga na un manera di mas ‘smooth’ cu ta posibel.
Encuanto esaki, a reuni cu Ahata y AAA y dialuna a reuni cu ATA. Den e reunion aki a trece henter e plan di comunicacion dilanti cu ta encera full e caminda pa dilanti di con ta bay saca e informacion afo cu ta relevante. Pa loke ta e implementacion, e Parlamentario ta splica cu naturalmente bo tin cu pensa den propaganda, jingle y diferente manera pa bo por trece esaki na e pueblo. Principalmente pa comunidad por wak kico ta e meta di e prohibicion aki. “Hopi biaha y keto bay hende ta puntra pakico no mas producto anto mi ta kere unabes cu esaki wordo implementa, y cu e pueblo ta carge por wak otro. Pasobra mester bisa cu e realidad ta, cu un ley tin su efecto ora cu e pueblo mes ta carge. Bo por tin hopi ley, pero si e pueblo mes bisa cu esey ta trabou di autoridad anto e ora nada ta pasa atrobe.”
E ta sigui splica cu den e caso aki mester corda cu e ta na bienestar di nos miedo ambiente y bienestar di nos pais. Y danki na nos pais bunita aki, por tin asina hopi turista riba dje, cu tambe nos tur ta biba di dje na un manera of otro. Kiermen cu tur e educacion di e ley aki y su implementacion ta bay tuma luga den e proximo lunanan nos dilanti. Bon Dia Aruba a puntra Sr. Rasmijn si e ta kere cu faltando 4 luna ta suficiente pa conscientisa comunidad riba e prohibicion aki. El a bisa cu Sigur cu si ya cu e ley a pasa 6 luna prome, pues comerciantenan ta na altura riba ki dia e ta drenta den efecto (entrante 1 januari 2017)
Superfood
Hopi ta cumpra e saconan re uzabel cu nan ta bende, sinembargo e caheronan tin e saconan di plastic ainda ta duna den e supermercado como ‘servicio na e cliente’, e empleado di Superfood. E supermercado ta consciente cu esaki ta malo pa e medio ambiente y ta kere cu ora cu no por uza nan mas, ta stop cu nan y ta cuestion di adapta na e cambio.
Supermercadonan origen Asiatico
Locual Bon Dia Aruba a tuma nota di dje, cu ultimo lunanan aki e supermercadonan di origen Asiatico ta uzando mas saco di plastic pa pone producto di hende ora cu haci compras manera pa caba cu nan. Tambe por a mira algun cu a pone varios rol na benta riba nan shelf. Segun informacion di e persona encarga cu un di e supermercado aki, el a bisa cu nan tin e rolnan di saco di plastic cumpra na cantidad warda y teniendo na cuenta cu e lo wordo prohibi, nan ta purba uza nan of bende nan na esun cu mester pa nan no keda pega cu nan. Segun un supermercado un di e rolnan aki ta costa 2 florin y tin 50 saco, pues facil supermercadonan na Aruba ta gasta mas cu un rol tur dia.
Tienda y supermercado sin saco plastic
PriceSmart sigur ta un luga di haci compras cu ta uza solamente e saconan re uzabel cual nan mes ta bende (of bo por bay cu uno di bo mes). Akinan por mira claramente cu hende ta adapta nan mes y sa cu eynan bo mester cana cu un saco pa compras, tene producto na man of bay cu e garoshi cu producto te na auto y warda esaki bek ora cu des carga nan.
No ta PriceSmart so ta un negoshi cu ta uza saco re uzabel of di otro material cu si lo keda legal. Segun e Parlamentario: San Marina, Kowloon, ASD, Trash by Ronchi, Starbucks, General entre otro, ta algun ehempel di negoshinan y ta sigur cu tin hopi mas.
