(DW) – Diahuebs ultimo, Donald Trump a priminti cu e prome dia cu e asumi e funcion di presidente na november, e ta bay cera fronteranan di Merca na inmigrantenan ilegal.
Cu su horea tapa, Trump a acepta e nominacion presidencial na Congreso Nacional Republicano cu a tuma luga na Milwaukee, cu un discurso den cual a describi un programa amplio y na unda a recorda loke a sucede diasabra di siman pasa den e atentando na Pennsylvania.
E referencia na “invasion migrante” no a falta, bisando cu ta bay cera frontera cu Mexico e prome dia di su segundo mandato y manteniendo su discurso anti inmigracion cu ta su caracteristica.
E candidato republicano a sigura cu crimen na Venezuela y na El Salvador ta bahando, no pa motibo di su gobernantenan, sino “pasobra nan ta mandando nan asesinonan pa Merca.”
“Esaki ta un invasion,” Trump a bisa utilisando un lenguahe cu a ser critica pa deshumanisa migrantenan.
El a priminti di caba cu e crisis migratorio cerando e frontera y lo caba di construi e muraya na frontera cu Mexico.
Pero Trump no tabata parce e mesun Trump den su prome discurso despues di intento di asesinato cu a sufri den un mitin siman pasa. Trankilo y sin lanta su voz, a presenta dilanti su siguidonan na Convencion Nacional Republicano pa acepta e nominacion cu un mensahe di tono di conciliacion, aunke cu propuestanan radical, manera semper.
El a cuminsa papia yamando na cordura politico “cu ta necesario pa cura e division den sociedad.”
“Mi ta presenta mi mes dilanti boso awe nochi cu un mensahe di confiansa, forsa y speransa. Mi ta presenta pa presidente pa tur Merca, no pa e mita, pasobra no tin victoria ganando e mita so,” el a bisa.
