Gobierno di Donald Trump ta pensa riba e posibilidad cu autoridad Mericana por separa mama di su yiunan, ora cu nan ta crusa di manera ilegal frontera di Merca, cu obhetivo di kita deseo di famia Mexicano di cuminsa e caminda peligroso di bay Merca, secretario nacional di seguridad John Kelly a informa.
“Si, cu obhetivo di evita cu por nace mas movemento y rednan di traficante di persona, anto nos ta pensa riba posibilidad di separa yiunan di inmigrante clandestino di nan parientenan.” Nos lo trata tur mucha chikito bon, ora cu nos bay pensa kico nos por haci cu e hende grandinan,” Kelly a bisa na CNN.
Mester pone e mucha chikito temporalmente cerca famia cu por cuidanan pa un rato, of cu algun pariente cu ta biba na Merca, na e momento cu nan representante ta bao cuido, pa despues bay den un proceso di interogacion.
“Nos tin un tremendo experimento ora cu nos a cuida mucha chikito cu tabata biaha sin pariente”. “Nos a duna departamento di salud y servicio humano tur mucha y nan a haci un labor di cuido hopi bon, masha bon. Nan a duna cuido na un centro temporal of na un famia cu ta biba na Merca, “ el a bisa.
E medida aki ta busca pa hende Latino perde e deseo di bay riba un biahe peligroso desde Mexico pa Merca.
E lucha contra inmigracion ilegal na frontera sur di Merca ta un cos cu Trump a priminti den campaña, y e ta inclui tambe e construccion di un muraya na e limite di frontera entre Mexico y Merca.
Kelly ta un general retira, cu ta encarga cu controla inmigracion y asina tambe di construccion di e muraya. E ta dirigi e di tres secretaria (ministerio) mas importante den gobierno di Merca (prome ta secretaria di defensa y secretaria di veterano di guera). Den secretaria di defensa y veterano di guera ta traha mas di 240 mil funcionario cu ta distribui den 22 agencia federal y cu tin e obhetivo di cuida Merca di tur menasa.”
Kelly ta un di e hendenan cu ta apoya e decreto di migracion cu presidente Donald Trump a firma na fin di januari. Kelly a critica funcionarionan di husticia di Merca pa decision cu nan a tuma di blokea e decreto ey. “Hues di Merca ta biba den un bubble cu no ta permiti nan mira e berdadero menasa cu tin riba nos pais,” el a bisa.
Dialuna ultimo, Trump a emiti un decreto nobo pa reemplasa e prome decreto, cu a ser revoca. E decreto nobo ta prohibi cu persona cu ta bin for di cierto pais, mayoria di nan musulman, por drenta den Merca pa un periodo di 90 dia. E decreto no ta conta pa esnan cu tin residencia na Merca atraves di un ‘green card’.
