Ayera mainta, Leerorkest Aruba a sinti cu tabata un dia hopi special caminda maestronan di musica cu ta duna les na cinco scol di Aruba den klas 3, 4 y 5 a haya un donacion hopi importante, manera nan a sigura.

Juliette van Romondt, coordinador, a informa na redactor di Bon Dia Aruba cu e organisacion tin un presupuesto hopi chikito na e momentonan aki y cu nan ta purba tur cos pa haci riba nan mes. Tempo pasa nan a haya un donacion di laptop y projectornan, pero el a ripara cu den e lesnan, e zonido di un speaker ta hopi importante. “Den docent kamer no tin digiboards, no tin zonido, no tin nada pa duna les na muchanan y awe nos a haya un donacion di 10 speaker pa nos docentenan”, Van Romondt a informa.

Na e momentonan aki nan tin casi 400 mucha cu ta hayando les di musica na cinco scol, y otro muchanan di otro scolnan ta haya les online. Nan ta duna tur loke nan tin pa muchanan por haya les cu instrumentnan. Mirando cu nan no tin un luga fiho pa warda instrumento y instrumento ta hopi costoso – nan ta bin for di un subsidio di Leerorkest di Amsterdam y Ministerio di Husticia di Hulanda.

Leerorkest tin un aspecto social den esaki pa yuda muchanan desaroya den e parti social comunicativo, cu tin beneficionan hopi bon pa cu nan estudio y despues nan formacion, manera Johnny Scharbaay, miembro di directiva a sigura.

“E parti di instrumentacion ta hopi importante pa nan por cuida nan bon. Cada scol tin e responsabilidad pa cuida nan y practicamente e instrumentonan ta di e muchanan, e responsabilidad ta keda pa scol y e muchanan cuida nan bon”, Scharbaay a señala.

Hopi biaha esaki ta costa hopi placa, y pa e motibo ey nan mester di fondonan pa e mantencion y reparacion di instrument. Debi cu nan no tin luga of compania oficial cu ta drecha instrumentonan na Aruba, e docentenan mes por drecha e instrumentonan y nan ta haciendo esey tambe.

“Nos ta hopi gradici na nan cu ta yuda kere den e proyecto di Leerorkest Aruba pa e muchanan sigui bay dilanti, y tambe na e bestuur cu ta trahando duro pa e por funciona y cana bon. E ta un desafio cada dia pa cumpli cu tur e rekisitonan, y semper cosnan ta pasa na caminda, pero nos ta sigui lucha pasobra musica ta pa e muchanan”, el a expresa.

Igualmente nan tin mester di fondonan pa lesnan online pa motibo cu nan ta duna les na cinco scol so y nan no tin suficiente maestro. “P’esey nos a implementa e lesnan online, cu Telearuba ta filma den su studio y maestronan ta filma pafo den espacionan habri. Nan ta filma hopi den luga di naturalesa cu e docente, pasobra tur e muchanan di Aruba por haya les di musica” el a comenta.

Pa finalisa, el a informa cu e scolnan unda nan ta duna les ta Scol Laura Wernet Paskel, Scol Primario Princes Amalia y na San Nicolas na Sint Paulus School, Graf von Zinzendorf School y Aruba Adventist Academy.