Fundacion Contra Cancer di Prostaat y Fundacion BOB pa screenmento pa cancer di pecho a ricibi un sorpresa grato durante di e congreso multi disciplinario pa hematologia y oncologia cu donacionnan valioso pa nan organisacion. E reconocemento for di e organisadonan ta un extra motivacion pa e miembronan di e fundacionnan cu ta traha incansablemente pa logra conscientisa comunidad pa ta atento y haci nan screenmento pa cu cancer di prostaat y cancer di pecho.
Cancer di prostaat
Jurgen Benschop di Fundacion Contra Cancer di Prostaat a splica cu e organisacion a wordo lanta primordialmente pa ex pashentnan di cancer cu ta traha cu Wilhelmina Kankerfonds, Stichting BOB y Mary Joan Foundation pa conscientisa comunidad. Nan grupo meta ta specificamente e comunidad masculino y nan ta buscando pa kibra e taboo tocante di e enfermedad cu ta afecta asina hopi homber. Nan ta dirigi esfuersonan na motiva e hende homber pa haci su testnan, su screenmento y si acaso mes e wordo diagnostica cu cancer di prostaat e ta haya e sosten y cuido necesario tempran pa su chensnan pa cura ta mas grandi.
E meta principal di e fundacion ta pa salba mas bida. No tin mucho estadistica, Benschop a splica, p’esey mes ta importante pa hende cuminsa papia di e enfermedad pa no tin mas hende ta muri cu e malesa sin haci nada pa preveni esaki of cu algo ta wordo haci pa yuda e persona. E ta comparti e opinion cu e congreso cu a tuma luga siman pasa na Aruba ta hopi importante, y, por cierto, tambe a refleha e importancia di ta na tempo, tin conocemento di sintomanan y actua tempran pa salba bida.
Jurgen Benschop a atende e congreso y a splica cu tabatin hopi informacion medico, di cual pa e fundacion loke ta importante tabata e estadisticonan y con e situacion ta envolve, pa tende for di dokternan for di rond mundo con nan ta maneha e malesa, con hospital y otro instancianan na Aruba ta maneha e situacion.
E fundacion ta boga pa un comunidad sostenibel unda cu ta garantisa cu e hende homber jong tin un futuro si e tin accion pa cu prevencion na tempo. November ta e luna pa dedica atencion na malesanan cu ta afecta hende homber y e fundacion contra cancer di prostaat lo tin diferente accion y campaña di conscientisacion durante di e luna aki.
Cancer pecho
Ydelle Orman tabata entre e miembronan cu a ricibi e donacion pa Stichting BOB, cu ta haci screenmento pa cancer di pecho den comunidad pa hende muhenan entre 45 pa 75 aña di edad. E fundacion a wordo funda na october 2012 y actualmente a cuminsa haci screenmento pa cancer di pecho na IBISA. El a comenta cu hopi entusiasmo cu e donacion tabata un sorpresa grandi, e ta hopi bonbini y ta yuda den e pago cu mester haci riba e mashin pa haci mammogram cu ta na Aruba y den uzo caba. Orman a bisa cu nan a haya hopi informacion durante di e congreso y esaki sigur ta yuda tur hende ta mas prepara tocante cancer.
A splica cu un di e cosnan cu Stichting BOB falta ainda ta un software pa canalisa informacion y saca estadistica tocante di e resultadonan di e screenmento cu nan ta haci. E software entre otro mester indica cuanto caso di cancer di pecho a wordo detecta, cuanto persona no a haya cancer, y pa cu pashentnan di cancer, cuanto ta sobreviviente, etc. E meta ta pa 21 mil hende muhe saludabel entre 45 y 75 aña di edad ricibi un mammogram den e proximo dos añanan. Ydelle Orman a splica cu e personanan cu ta cay den e grupo meta lo ricibi un invitacion via di post pa bin haci un mammogram gratis, pa cual e gastonan ta completamente cubri pa AZV.
Stichting BOB ta pidi pa tur esunnan cu ricibi un invitacion bin haci nan screenmento. Finalmente, loke e fundacion kier logra ta salba bida pa medio di deteccion tempran di cancer di pecho y na mes momento aumenta consciencia den nos comunidad pa cu cancer di pecho, su sintomanan, prevencion y un miho calidad di bida. E screenmentonan diario ta cuminsa na luna di november.
