Un vista rapido riba e posicion dominante di e dos partidonan grandi – AVP y MEP – den politica di 1986 te awe, ta mustra nos cu esaki semper a mustra un tendencia di subi o baha, cu actualmente un bahada atrobe.
E siguiente tabel ta duna un impresion di e total di e votonan di AVP y MEP hunto, compara cu e total di voto.
Voto den Eleccion 2001 – 2021 di MEP y AVP como % di Total
| Partido | 2001 | 2005 | 2009 | 2013 | 2017 | 2021 |
| AVP | 12.749 | 16.725 | 26.476 | 33.114 | 23.385 | 18.348 |
| MEP | 25.172 | 22.002 | 19.804 | 17.658 | 22.078 | 20.701 |
| % AVP/MEP | 79.1 | 63.8 | 84 | 87.8 | 78 | 66.6 |
Por mira den e tabel presenta aki desde 2001 por mira e total di voto di ambos hunto, cu e dominio ey tampoco semper tabata asina fuerte. Principalmente na 2005 a surgi varios partido, un total di 11, cu a percura pa e cantidad di voto di e partidonan grandi a bay back te na 63,8%, den ultimo 20 aña en todo caso e punto mas abao, sigui pa e 66.6% di eleccion di diabierna pasa.
Un situacion cu ta hopi parecido na e actual imagen di eleccion, pero cu despues a mira varios partido politico no tabata capaz di mantene nan posicion y organisacion, loke a hiba atrobe na e apoyo di electorado na e partidonan grandi, cu aña 2013 como punto culminante cu casi 88% di e total. Principalmente e caida den apoyo di partido AVP desde e tempo ey a conduci na e nivel abao actual di apoyo pa e partidonan grandi.
Di otro banda por observa cu MEP tabata mas constante durante e añanan, sin embargo no a yega mas na e nivel di 2001, siendo e tempo ey e promer partido cu a logra un mayoria absoluto pa goberna nan so.
