Dia 5 di juli awor, Republica Dominicano lo celebra otro eleccion presidencial den su historia democratico.
E biaha aki e pueblo Dominicano lo eligi vice-presidente, diputadonan, senadornan y miembro pa parlamento Centro Americano. E eleccion aki tambe lo wordo celebra na Aruba tentativamente na Centro di Bario Playa Pabao dia 5 di juli awo, entre 8or di mainta y 6or atardi.
Sinembargo varios keho y reclamo a wordo entrega recientemente pa medio di e grupo “Dominicanos Unidos en Aruba.” Nan a exigi den nomber di comunidad di Dominicano pa Junta Central Electoral (JCE) bin cu un centro akinan pa otorga cedula y acta den e mesun consulado, ya cu na Aruba tin un comunidad di 7mil Dominicano.
Vocero di Consulado di Republica Dominicana, Edward McCollum, a declara na Bon Dia Aruba cu e consulado a haci esfuerso pa trece un comision di JCE den varios ocasion pa atende asuntonan cu tin di haci cu problema di documentacion di e comunidad Dominicano na Aruba. E ultimo biaha cu JCE a bin Aruba solamente 35 Dominicano a haci uzo di nan servicio.
Esaki a pesar di un campaña masivo cu e consulado a realisa den varios emisora cu tin programanan radial realisa pa Dominicanonan. “Nos a duna tur plaso, y nan no a probecha,” el a bisa. Te hasta Republica Dominicana a duna un amnistia entre 2010 y 2014 pa yuda tur ciudadano cu tabatin problema cu nan documentacion pa drecha nan, sin mester di bay na un tribunal electoral.
El a informa cu e consulado a yega di realisa un campaña di documentacion pisa di JCE entre aña 2015 y 2016. Despues JCE a bolbe brinda su servicio den e consulado durante 2017 y 2018.
Despues di varios luna e consulado a cuminsa ricibi bishita di Dominicanonan cu nan cedula a vence, ya cu nan mester renoba nan paspoort.
Sr. McCollum a mustra e gestion cu consulado a realisa cerca JCE na luna di october 2019 pa bin Aruba. Sinembargo el a laga sa cu e instituto aki ta uno totalmente autonomo y ta nan esunnan cu ta dicidi ki momento nan ta bin Aruba.
Igualmente Sr. McCollum a bin cu un bon noticia. El a laga sa cu JCE a aproba cu e Dominicanonan cu a perde su cedula, nan por haya un duplicado. Tambe esun cu tin su cedula den mal estado nan por haya un duplicado. Igualmente el a bisa cu a wordo aproba cu e cedula cu ta bisa atras “no vota” den eleccion 2016, nan lo haya un duplicado tambe. E proceso aki tin un balor cune.
