Ayera desde mainta tempran, e banderanan di Aruba y Republica Dominicana tabata zwaai dilanti Centro di Bario Playa Pabou, unda cantidad di Dominicano residencia riba nos isla a bay eherce nan derecho di voto pa eligi presidente y miembronan di Senado of Congreso di nan pais natal.
E persona encarga di e Hunta Electoral di Rep. Dominicana na Aruba, sr. Luis Contreras a declara na Bon Dia Aruba su satisfaccion riba e bon desaroyo, concurencia y civismo cu su paisanonan Dominicano a demostra durante e eleccion di ayera.
Eleccion y votadonan
Sr. Contreras a bisa cu e eleccion aki a cuminsa 6’or di mainta manera tabata stipula, y fei e ora ey e concurencia di Dominicano tabata constante.
Na Aruba mas cu 3 mil Dominicano tabata den condicion di bay vota den eleccion pa eligi presidente y Senadonan. Di nan algo mas cu 1800 ta registra den e censo of “padron” electoral pa vota na Aruba. E resto di votadonan ta debi na un ley cu a permiti cu tur Dominicano cu tin nan cedula nobo of “cedula inteligente of biometrico” lo por a eherce e derecho constitucional y democratico aki.
Pa banda di 2’or y mey atardi mas cu 1.200 Dominicano a bay Centro di Bario Playa Pabou pa deposita nan voto pa nan candidatonan y/of partidonan di nan preferencia. Sr. Contreras a calcula cu pa 6’or atardi cu eleccion ta cera, mas cu un 50% di e votado por a cumpli cu e compromiso civico y democratico aki.
“Mi ta kere cu si!. De facto ta falta 3 ora y mey pa cera; y ya casi nos ta yegando na un 50%. Mi ta calcula entre 1.800 pa 2 mil persona ta bin vota awe”, el a bisa ayera tardi.
Tres mesa di votacion tabata disponibel na Centro di Bario Playa Pabou y cada un tabatin nan respectivo miembronan di e colegio electoral. Nan a ricibi e debido training na Aruba pa cumpli cu e compromiso civico aki. Pa 5’or di mainta e miembronan di e colegio electoral tabata presente na Playa Pabou pa realisa e trabou di instalacion di e colegio electoral Dominicano na Aruba.
Civismo
El a informa cu tur cos a bay sin niun novedad. E ta haya cu e simpatisantenan di e partidonan politico a madura hopi compara cu eleccion pasa; y tur delegado di e partidonan a mustra nan compromiso cu altura.
Mirando e forma con e fluho di votado para den rij a bay pa 6’or atardi tur Dominicano interesa pa bay vota por a cumpli cu e compromiso civico aki, ya cu e proceso a cana diligentemente. Pa 7’or anochi lo a wordo calcula pa cuminsa cu e proceso di contamento di voto.
E comerciante Dominicano, sr. Gregorio Burgos a aplaudi e forma con e eleccion Dominicano a tuma luga na Aruba. Tambe el a bisa cu divulgacion di informacion tabata relevante, ya cu cada Dominicano tabata debidamente informa y consciente di e proceso electoral aki.
“Nos ta akinan como entre famia. Esunnan cu ta di un partido contrario na esun di mi conviccion como votado, nos ta trata igual entre nos mes. Akinan no tin niun diferencia”, el a bisa.
El a elogia e echo cu nan como Dominicano bibando na Aruba por a vota pa determina e destino politico di nan pais natal. El a bisa cu esaki ta un logro di e ultimo gobiernonan di Leonel Fernadez y Danilo Medina cu a permiti un Hunta Electoral pa facilita tur proceso di otorgamento di cedula pa nan por vota.
