(CaribbeanNewsNow) – Forza di naturaleza ta causa desastre anualmente na tur parti di mundo, matando hende y animal, cortando servicio y lagando diezmiles sin vivienda.
Segun un informe di Reuters na 2017, como 14 miyon hende ta keda sin hogar cada aña como average, debii na desastre natural. Esnan vulnerable den nos region no ta un excepcion, manera e isla chikito Dominica, di apenas 72.000 habitante. E isla aki a keda devasta despues di e tormenta Erika y e horcan Maria. Segun UNDP a reporta, Dominica a perde 90% di su GDP e tempo ey. E daño di Maria tabata calcula na US$ 1,3 biyon, 226% di e GDP di 2016.
E pais a keda sin recurso pa reconstrui nan pais. Pero gobierno a actua y a inicia un programa pa recuperacion sin recuri na comunidad internacional pa ayudo grandi, cu lo a crea debe grandi tambe.
E necesidad pa reconstrui extensamente y e ambicion pa adapta na cambio di clima a resulta den formulacion di maneho nobo di planificacion urbano y desaroyo di comunidadnan di vivienda pa persona di entrada medio y abao. E Housing Revolution Programme (Desaroyo Integra di Vivienda) a nace. Cu fondo di e programa yama ‘Citizenship by Investment (CBI)’ y desaroya a traves di Public-Private Partnership, e iniciativanan a logra provee vivienda nobo, moderno, y integra pa e famianan di entrada mas modesto. Den dos aña a crea e promer proyecto di 350 unidad residencial, un compleho comercial di 28 unidad, un centro comunitario, un centro di salud y un cancha recreativo na e isla.
Den ultimo tres aña, a crea 12 otro proyecto, culminando asina alrededor di 2.000 vivienda na varios parti di e isla. Den e diseño di e proyectonan a tene cuenta cu asunto manera mayor resistencia contra tormenta, muraya pa contene awa, drenahe di awa sushi y awa halto durante tormenta, y tur infrastructura di utilidad ta bao tera.
