Desaroyo monetario
Den e luna di october2016, e cantidad di placa den circulacion a subi cu Afl. 19,1 miyon te na Afl. 4.063,8 miyon, compara cu e luna anterior. Esaki a resulta for di un crecemento den tanto e activo domestico netto como e reserva di divisa netto di Afl. 16,0 miyon y Afl. 3,1 miyon, respectivamente. E subida den e activo domestico netto a surgi door di un crecemento di Afl. 17,3 miyon den transaccionnan no relata na credito y un caida di Afl 1,3 miyon den credito domestico. E expansion den transaccionnan no relata na credito a resulta for di crecemento den e asina yama “shareholders’ equity”, “premises and equipment” y“accounts receivables and prepayments” y un reduccion den “borrowings” como tambe transaccionnan di clearing. Credito domestico a mengua cu Afl. 6,6 miyon den credito bancario na e sector priva y un crecemento di Afl. 5,3 miyon den credito netto na e sector publico. E caida den credito bancario na e sector priva ta debi na bahada den credito na consumidor (-Afl. 10,2 miyon), cual a wordo parcialmente mitiga pa crecemento den hipoteca pa vivienda (Afl. 2,2 miyon) y credito na empresa (Afl. 1,4 miyon). E subida den credito bancario netto na e sector publico ta debi principalmente na un caida den depositonan di gobierno di Afl. 6,0miyon. Di otro banda, e fondo pa desaroyo a subi cu Afl. 1,9 miyon. E expansion den reserva di divisa netto di e sector bancario ta debi na compra netto di divisa di Afl. 197,8 miyon for di publico, principalmente asocia cu turismo, transferencia netto for di cuentanan den exterior di companianan local y inversion directo. Esaki a wordo parcialmente mitiga pa benta di divisa di Afl. 194,7 miyon na publico, primordialmente relaciona cu pago netto pa importacion di mercancia, otro servicionan y e asina yama “income account”.
Inflacion
E nivel general di prijs, cu ta wordo midi door di e indice di prijs di consumo,a registra un bahada di 0,1porcientoden e luna di october 2016,compara cu october 2015. E contribuyente principal na e caida aki ta e componente“Vivienda”, cual ta debi primordialmente na un reduccion den prijs di electricidad. Di otro banda, e componentenan“Transporte”, “Cuminda y bebida no alcoholico” y “Paña y Sapato”a registra un aumento. Si exclui e componentenan di cuminda y energia for di e indice di prijs di consumo, inflacion ta mustra un crecemento di0,7 porciento compara cu October 2015.Pa loke ta trata e promedio anual di e tasa di inflacion, esaki a registra un bahada di 1,0 porciento na October 2016, mescos cu september 2016.
Turismo
Na October 2016, e cantidad di turista a registra 76.491 bishitante, cual tabata29,8 porciento (-32.533 bishitante) menos cu na october 2015.E caida aki a resulta principalmente door di bahadanan den e mercado di Latino Americano di 64,7 porciento (-30.862 bishitante) y e mercado Norte Americano di 3,2 porciento(-1.598 bishitante). Di otro banda, e mercado Europeo a registra un subida di 14,3 porciento (+1.037 bishitante).E caida den e mercado Latino Americano a wordo primordialmente causa pa menos den bishitante for di Venezuela (-30.975 bishitante of -76.7 porciento).E bahada den e mercado Norte Americano a resulta pa gran parti for di un reduccion di 3,6 porciento den bishitante for di Merca (-1.701 bishitante). E aumento den e mercado Europeo ta debi pa un gran parti na un crecemento di 52,3 porciento den bishitante for di Gran Britania (+753 bishitante). E cantidad di turista crucero a baha cu 24,7 porciento (-12.604 bishitante)te na 38.349 na october 2016, compara cu october 2015.E cantidad di barconan a registra un bahada, for di 20 na october 2015 pa17na october2016.
Entrada di Gobierno
Na october 2016, entrada di gobierno a suma Afl. 95,7 miyon, un aumento di Afl. 11,5 miyon compara cu e mesun luna di e aña anterior. Esaki a resulta for di un subida di Afl. 14,1 miyon den entrada di impuesto, cual a wordo parcialmente mitiga pa un caida di Afl. 2,6 miyon den entrada no relata na impuesto. E crecemento den entrada di impuesto ta relata principalmente na aumento di accijns riba gasolin (+Afl. 16,8 miyon), impuesto riba entrada (+Afl. 1,6 miyon), accijns riba cerbes (Afl. 0,8 miyon) y benta di negoshi (B.B.O)(+Afl. 0.5 miyon). Di otro banda, a registra caida den impuesto riba ganashi (-Afl. 3,6 miyon), impuesto riba importacion (-Afl. 0,9 miyon) y impuesto riba e asina yama “grondbelasting” (-Afl. 0.8 miyon).
