(NLTimes)—Varios decenas di dokter na Amsterdam a cuminsa parti boet na pashent cu ta perde nan afspraak sin cancela nan. Tin hopi presion riba dokternan na Hulanda, y e dokternan ta sinti cu un ausencia ta perde tempo cu por ser dedica na otro pashent. Nan kier duna boet pa asina descurasha e comportamento aki, segun Parool ta reporta.
Ausencianan ta birando un problema persistente, segun Paulien van Hessen di e Amsterdamse Huisartsenalliantie, e asociacion pa dokternan den e capital Hulandes, a conta e corant. “No ta keda tende cu hende no ta presenta, y esey ta resulta den hopi frustracion entre empleadonan di practica,” el a bisa.
Algun practica di dokter ta usa listanan di espera pasobra nan oranan di consulta ta completamente yen. “E ora un ausencia ta hopi fastioso. Nos ta haci nos best pa yuda tur hende lo mas pronto y mas miho posible. Como pashent, bo por yuda nos por medio di cancela na tempo ora bo no mester di ayudo mas.”
Parool a conduci un encuesta cu dokternan na Amsterdam y a descubri cu varios decenas ta dunando boet na pashentnan cu no ta presenta. E boetnan ta varia entre 10 pa 30 euro. Algun dokter ta dobel e suma ora un pashent perde un consulta mas largo of mas cu un afspraak.
David Koetsier, un dokter na Amsterdam-Noord, ta un di e dokternan cu ta castiga ausencia. “E ta un manera pa nos apela na hende tocante nan mesun responsabilidad,” el a conta Parool. “Si tin un motibo valido, e invoice ta ser cancela. Nos ta extremamente indulgente.” E meta principal di e boet ta pa actua como un stimulacion pa prevencion.
E Patient Federation, cual ta representa e interesnan di pashent, ta contra e boetnan. “Nos ta kere cu e boetnan no ta beneficia e relacion entre dokter y pashent. Un bon relacion mutual por yuda preveni ausencia,” un vocero a bisa. “Motibonan pakico pashent no ta presenta por varia ampliamente. E tambe por ta causa, por ehempel, pa miedo di tratamento of costo. Bo no kier castiga hende pa esaki cu un boet.”
