Manera a bin sucediendo for di lunanan caba, na juli ultimo un grupo di dokternan di cas (HAVA) a bati alarma pa e cantidad di pashent cu nan ta atende, treciendo dilanti e problematica cu Aruba desafortunadamente no tin suficiente dokternan di cas y cu cada un di nan tin un promedio di 2.300 pashent.

Den un comunicado di prensa, HAVA a señala cu pa por sigura cu e pashent por haya e calidad di cuido cu e mester di su dokter di cas, stakeholders mester traha hunto pa por realisa un cantidad di pashent cu e dokter di cas por maneha na un manera sostenibel.

“HAVA su dokternan di cas kier yega na un situacion unda no ta “overbelast” e sistema di cuido primario, pa nan tambe como specialista den nan trabou brinda e servicio cu nan por. E experiencia aworaki ta cu door di e ampliacion di e cantidad di cuido cu ta wordo pidi, extra responsabilidadnan administrativo y exigencianan di calidad, no ta resta suficiente tempo pa cada pashent haya e atencion cu nan merece. Esaki ta preocupante y ta locual HAVA ta pidi atencion pe”.

Ademas tambe nan a indica cu “Solamente hunto nos por yega na un situacion duradero cu e meta pa mehora nos sistema di cuido na Aruba unda tur partido involucra lo beneficia”.

Pa cu esaki, Solange Tchong PR di AZV den un entrevista a trece dilanti cu dokternan di cas ta keda un reto pa motibo cu tin hopi dokter di cas cu ta yen, espacio ta limita y esaki ta keda un reto vooral pa pashentnan ora nan ta bisa cu nan kier haci un cambio.

AZV ta permiti esaki, tin opcion na ora un hende ta cambia di adres cu ta biba di San Nicolas pa Playa pero e ta sigui keda un reto pa motibo cu dokternan di cas ta un specialisacion riba su mes y tambe ta uno cu no ta wordo haya facilmente, manera Tchong a expresa y a sigura cu AZV tin atencion pa esaki.

“Hunto cu HAVA nos ta purbando di cada biaha purba di yega mas na otro, keda papia y discuti e parti di e cantidad di pashentnan cu tin inscribi pa cada dokter di cas, nos tin atencion na esaki y hasta nos ta purbando di wak e posibilidad di con por bay organisa esaki di un otro forma y haci’e mas eficiente y kisas hasta mas servicial pa e pashentnan di AZV ”, Tchong a comenta.

Igualmente, el a enfatisa cu tur asegurado di AZV cu kier comunica cu e departamento aki cu algun di nan ta yega na nan oficina pa entrega carta di pregunta of di reclamo, el a bisa cu ta hopi importante pa asegurado duna su datonan completo como firma den e carta, nomber completo, adres, number di telefon of e-mail pa asina AZV por comunica cu e asegurado di un manera mas miho.

AZV ta bin mustrando un desaroyo den nan aplicacion di telefon di AZV cu ta yama “Digital zorg pas” unda e aseguradonan ta haya nan carchi di AZV di un manera digital unda cu na e momentonan aki segun Tchong a bisa nan tin 66.000 cliente cu a registra, nan tin tambe mayornan cu a registra nan yiu y pa cu esaki el a sigura cu tambe nan tin e servicio pa e grandinan cu mayoria di biaha nan no ta mucho habil cu nan telefon unda cu nan ta disponibel pa yuda e persona via telefon of di manera persona na nan oficina ubica na Rumbastraat.

“Importante ta cu un bes cu bo tin e AZV app nos ta zorg pa duna bo notificacionnan unda si tin algun informacion of relato di prensa di AZV nos ta publica esey riba app unda nos ta contento cu esey y nos ta espera di haya mas cliente riba AZV”, el a finalisa.

Di loke ta trata cuido medico, si den caso aseguradonan ta sinti cu nan no ta hayando ayudo suficiente na e ora di sufri un malesa, AZV ta evalua esaki segun loke director di AZV Edwin Jacobs a expresa den un conferencia di prensa na luna di augustus.

“Si bo por haya un miho solucion pafo, kiermen na exterior, nos ta mand’, pero principalmente e ta wordo manda afo door di un specialista ora tin casonan di excepcion caminda aseguradonan ta haci e peticion pa bay afo y e ta bay afo”, el a bisa.

Tin tratamentonan cu por wordo duna na cas cu pa algun personanan ta bon pa keda den un ambiente compara cu den un camber di hotel na exterior unda el a afirma cu tin aseguradonan cu nan estadianan largo na hotelnan cierto momento ta cuminsa sinti agotamento, pero na final di dia ta specialista ta dicidi, e ta esun cu ta recomenda kico pa haci, pero na momento cu un pashent ta permiti pa sali di hospital den exterior, e dia despues e ta subi un avion un bin Aruba back.