SUR AFRICA – Un team di dokter Sur Africano na e ciudad capital di Pretoria a ser elogia como pioneros den campo di medicina global, despues di a realisa exitosamente e prome transplante di un ‘middle ear’ di pashent.

E logro – cu a uza tecnologia di 3D print pa reconstrui weso kibra di horea – ta celebra como un solucion a largo plaso pa perdida di oido conductivo. Ademas, e cirugia por wordo haci riba persona di cualkier edad, incluyendo baby recien naci, curando pashent di un forma di sordo causa pa daño fisico of infeccion den horea (middle ear) como tambe defecto congenito y malesa metabolico.

E prome pashent tabata un homber di 35 aña, kende a perde su oido despues cu un accidente di auto a devasta su horea. Pa motibo di e trauma cu el a sufri, e operacion a dura como un ora y mey.

E idea tras di e team medico na e Hospital Academico Steve Biko na Universidad I pretoria, ta profesor Mashudu Tshifularo, kende tabata studiando perdida di oido conductivo durante e ultimo decada, pero den e ultimo dos aña a cuminsa studia e uzo di 3D print pa proposito di scan y recrea completamente e wesonan mas chikito, of ossicles, di e horea – esta e hammer, anvil y stirrup.

Celebrando mediante un comunicado di prensa, Departamento di Salud di Sur Africa a cita Tshifularo su splicacion: “Door di reemplasa unicamente e ossicles cu no ta traha bon, e procedura tin menos riesgo cu protesis conoci y nan procedura di cirugia. Nos lo uza titanium pa e procedura aki, cual ta biocompatibel. Nos ta uza un endoscopio pa haci e reemplaso, pues e transplante ta lihe, cu tiki cicatriz.”

Mientras el a expresa orguyo pa ta e prome den mundo pa revoluciona e maneho nobo pa sordo, Tshifulara ta keda riba e punto cu e tratamento eventualmente mester bira accesibel y pagabel pa pashentnan pober, manera esunnan na hospital publico di Sur Africa.

E ta spera cu e y su team na e departamento di ornitorhinolaringologia di e universidad lo ricibi e fondonan necesario di gobierno y patrocinado priva pa sigura cu e tratamento innovativo aki por desaroya.