Dia 7 di januari ultimo a registra un accidente di un avioneta ambulance entre Valledupar y Bogota. E hechonan a laga cinco persona herido, na unda dokter Jorge Ecury Perdomo a perde su bida.
E informacion a ser verifica pa alcaldia di Valledupar riba nan rednan social, nan a menciona cu nan ta lamenta e fayecimento di Ecury.
Di su parti, alcalde di Valledupar, Ernesto Orozco tambe a pronuncia riba rednan social y skirbi: “Mi solidaridad cu e victima y personanan afecta pa e accidente tragico aereo na ciudad di Valledupar diadomingo mainta.”
E avioneta modelo Cessna 421 Golden Eagle a sali for di aeropuerto Alfonso Lopez y tabata hiba un mucha di 11 aña, ken mester a haya atencion medico na Bogota. Sinembargo, e aeronave a cay den pleno parke industrial di Valledupar.
Di su parti, comandante di Polis di departamento di Cesar, coronel Eduardo Chamorro a informa cu e aeronave a reporta un fayo despues cu a cuminsa bula y cu, pa e motibo ey, nan a purba aterisa di emergencia.
Ecury, segun medionan local manera RCN ta reporta, tabata un dokter cu a dedica su bida pa salba su pashentnan “como un berdadero heroe” y mientras e tabata dedica na esey, lamentablemente el a muri den un mision medico na momento cu e tabatin 59 aña di edad y tabatin mas di 30 aña di experiencia den area di salud.
Di parti di Bon Dia Aruba, condolencia na su famia na Aruba y na Colombia.
