Dokternan di cas na Hulanda tambe lo ta entre e promenan pa ricibi e vacuna contra Covid-19 sin importa e posicion di Agencia di Medicina Europeo pa un vacuna produci pa e compania farmaceutico Moderna.
E dokternan di cas no tabata riba e lista di persona cu lo haya prioridad na acceso na vacuna si e agencia solamente aproba e producto di Pfizer/BioNTech.
LHV, cu ta representa dokternan di cas rond di e pais, a haci e anuncio despues di dianan di negociacion cu Ministerio di Salud, Bienestar y Sport. Reunionnan a keda programa despues cu e ministerio a dicidi diasabra pa duna trahadonan di cuido intensivo y di emergencia prioridad, hunto cu e trahadonan di cuido di salud cu ta traha na cas di cuido, y cu ta haci bishita di trabao pa hende den estado di salud vulnerabel. Personal di ambulance y personal trahando den sala di coronavirus na hospital tambe lo haya prioridad pa e vacuna.
Agencia di Medicina Europeo tabata programa pa duna un veredicto riba producto di Moderna diaranson, cu un luz berde nificando cu Hulanda por cuminsa ricibi e vacuna e luna aki. “Den consulta administrativo awe (3 di januari), ministerio di Salud, Bienestar y Deporte y LHV a bay di acuerdo adicionalmente cu, si vacuna di Moderna no ta disponibel na januari, lo busca un solucion diferente pa vacunacion rapido di dokternan di cas”, LHV a bisa. “Lo evalua dia 15 di januari si un solucion alternativo ta necesario.”
