(AP) – Un dokter na San Diego acusa en conexion cu Matthew Perry su sobredosis fatal a declara su mes culpabel diaranson na conspiracion pa distribui e medicamento anestetico pa operacion ketamina.
Dr. Mark Chavez, di 54 aña, a haci esaki den corte federal di Los Angeles, birando e tercer persona den admiti culpa despues di e celebridad su morto aña pasa.
Fiscal a ofrece menos acusacion na Chavez y dos otro a cambio di nan cooperacion si nan duna informacion contra otro 2 sospechoso considera responsabel pa e morto a causa di sobredosis: otro dokter y un supuesto dealer cu aparentemente tabata conoci como “e reina di ketamina” di Los Angeles.
Chavez ta liber bao fiansa te ora cu e ricibi su sentencia. El a entrega su paspoort y a acepta entrega su licencia medico, entre otro condicionnan.
Su abogado, Matthew Binninger a bisa cu den Chavez su prome aparencia den corte dia 30 di augustus cu e tabata “sumamente repenti” y ta “purbando di haci tur loke e por pa coregi e eror cu el a comete.”
Tambe trahandocu e fiscalnan federal ta Perry su assistent, ken a admiti cu el a yuda obtene y inyecta e ketamina y un conocido di Perry ken tabata e mensahero pa e droganan.
Tur tres ta yudando e fiscalnan mientras nan ta persegui nan sospechoso principal” Dr. Salvador Plasencia, acusa di bende ketamina ilegalmente na Perry e luna prome cu su fayecimento y Jasveen Sangha, e supuesto dealer cu a bende e dosis letal na e actor. Ambos a eclara nan mes inocente y ta wardando nan huicio.
Chavez a admiti den su acuerdo cu el a obtene ketamina for di su clinica anterior y un distribuidor unda el a entrega un receta fraudulento.
Bao ley e lo por haya un sentencia di te hasta 10 aña den prizon ora cu e ser sentencia dia 2 di april, sinembargo e ta hopi probabel di ricibi hopi menos cu esey a causa di su trato y e cooperacion cu fiscalnan.
Perry su assistent a hay’e morto dia 28 di october aña pasa. E examinador medico a declara cu ketamina tabata e causa primario di su morto. E actor tabata usando e medicamento via su dokter regular como un tratamento legal pero no oficial pa depresion cu ta birando cada biaha mas comun.
Perry a cuminsa pidi mas ketamina di loke e dokter tabata dune. Alrededor di un luna prome cu e actor su morto, el a haya Plasencia, ken den su turno a pidi Chavez pa obtene e medicamento p’e.
“Mi ta imagina cuanto e mongol aki lo paga,” Plasencia a bisa chavez via mensahe, segun e documentonan di corte cu fiscalnan a trece dilanti. Ambos a topa otro na Costa Mesa, mita caminda entre Los Angeles y San Diego, y a intercambia por lo menos 4 tubo di ketamina.
Despues di a bende e medicamento na Perry pa 4,500 dollar, Plasencia aparentemente a puntra Chavez si e por sigui provee nan pa e por bira Perry su proveedor segun e fiscalnan.
Abogado mericano Martin Estrada a bisa or di anuncia e acusacionnan dia 15 di augustus cu e “dokternan a probecha di Perry su historia di adiccion durante e ultimo lunanan di su bida aña pasa pa provee ketamina den cantidadnan cu nan tabata sa ta peligroso.”
Perry a lucha cu adiccion pa añanan largo, for di tempo cu e tabata den “Friends” y a bira un di e celebridadnan mas grandi di su generacion como Chandler Bing. El a actua banda di Jennifer Aniston, Courteney Cox, Lisa Kudrow, Matt LeBlanc y David Schwimmer pa 10 temporada di 1994 te cu 2004 riba NBC su megahit.
