Un dokter di biologia molecular di 57 aña, cu dia 25 di december a biaha pa e region di Wuhan (China), lo por ta e prome caso di coronavirus na Mexico, segun secretaria di salud di estado di Tamaulipas, Gloria Molina a detaya.
“Ayera nos a ricibi un yamada pa reporta cerca nos un caso sospechoso di coronavirus. Un dokter cu tabata traha na Instituto Politecnico Nacional (IPN)”, Gloria Molina a bisa.
Di acuerdo cu e funcionario, e dokter a reporta cu dia 10 di januari el a regresa di China na Reynosa, y a haci escala na Mexico.
Despues di su yegada, e dokter di origen Asiatico a cuminsa presenta verkoud y tosamento, pa loke e mes a keda aisla den su cas, ‘manera e protocol ta marca’.
Molina a señala, cu e virus aki ta parce influenza, pero como ta un virus nobo no por haci un test lihe pa por identifica, asina cu mester warda di 36 pa 72 ora pa determina si ta existi of no e presencia di coronavirus.
El a señala cu te na e momentonan a realisa un estudio di contactonan, loke ta nifica, personanan cu tabatin contacto cune, asina como Centro di Biologia Molecular na Reynosa, unda e ta traha.
Ayera mainta, presidente di Mexico, Andrés Manuel López Obrador a indica cu autoridadnan di salud tabata investiga e caso.
Autoridadnan di e provincia Chines Hubei, unda a origina e coronavirus di e neumonia di Wuhan, ayera diaranson a aumenta e e cantidad di fayecido pa 17, segun e Comision Nacional di Sanidad.
