Un dokter Chines kende a haya problema cu autoridadnan den e pais comunista pa bati alarma trempan pa brote di coronavirus a fayece awe despues di sufri e malesa.
Hospital Central di Wuhan a bisa riba su rednan social cu Dr. Li Wenliang, un oftalmologo di 34 aña di edad, ‘desafortunadamente a bira infecta durante e lucha contra epidemia di pneumonia di e infeccion nobo di coronavirus’.
Polis local a castiga Li pa ‘plama rumor’ tocante e malesa na fin di december, segun reportenan. E brote, centra na wuhan, awho a infecta mas di 28,200 persona rond mundo y a cobra mas di 560 bida, dunando impulso na restriccion di biahe y cuarentena rond mundo y un crisis paden di e pais di 1.4 biyon.
Organisacion Mundial di Salud (WHO) a tweet: “Nos ta profundamente tristo pa fayecimento di Dr. Li Wenliang. Nos tur mester celebra e trabou cu el a haci” riba e virus.
Dentro di mey ora despues di anuncia cu Li tabata den condicion critico, e hospital a ricibi casi 500mil comentario riba su post den rednan social, hopi di nan sperando cu Li lo sobrevivi.
Li tabata entre un cantidad di profesional medico na Wuhan cu a purba di adverti coleganan y otronan ora gobierno no a haci esaki, manera Bon Dia Aruba a reporta den nos edicion di ayera.
Otro desaroyonan rond e malesa.
Un baby recien naci na China a bira e persona mas jong infecta pa e virus. E baby a nace diasabra na Wuhan y a confirma positivo apenas 36 ora despues, segun autoridadnan. Pero no ta cla exactamente con e baby a bira infecta. Zeng Lingkong, director di malesa neonatal na Hospital Infantil di Wuhan, a bisa television Chines cu otro mamanan infecta a duna luz na baby cu a test negativo, pues no ta conoci ainda si por transmiti e virus durante embarazo.
China a termina construccion di un segundo hospital ayera pa isola y trata pashent – un centro cu 1,500 cama na Wuhan. Anteriorimente e siman aki a construi otro hospital di mil cama cu cambernan prefabfrica, y cambernan di isolacion a cuminsa tuma pashent.
Autoridadnan tambe a traslada hende cu sintomanan mas leve den hospitalnan improvisa den arenanan deportivo, centro di exhibicion, y otro espacionan publico.
En total, mas di 50 miyon persona ta bou cuarentena virtual den provincia Hubei, den un esfuerso sin precedente – y sin prueba – pa controla e brote.
Mientras tanto a cuminsa test un droga nobo antiviral riba un grupo di pashent ayera, segun agencia noticiero oficial Xinhua News. E droga, Remdesivir, ta traha pa e compania di biotecnologia Mericano, Gilead Sciences.
Antiviralnan y otro droganan por reduci severidad di un malesa, pero ‘te awo, ningun antiviral a demostra di ta efectivo’ contra e virus nobo, segun Thanarak Plipat, director general interino di departamento di control di malesa di Ministerio di Salubridad di Thailand.
