Aunke no tin cifranan di entre añanan 2011 pa 2015 pa e cantidad di casonan nobo di cancer di cuero cu ta wordo diagnostica anualmente, specialista di Cuero y Enfermedadnan Venerico, Dr. John Kock ta bisa cu e impresion ta actualmente cu tin mas caso cu apenas algun aña pasa. E specialista ta splica cu e ultimo cifranan cu tin di laboratorio ta 125 caso nobo pa aña te cu 2010 y den e tempo ey e mes tabata haya 3 pa 4 caso nobo pa luna. Dr. Kock ta sigui bisa cu den e ultimo añanan e ta hayando 3 pa 4 pashent nobo cu cancer di cuero pa siman. Esaki ta conduci pues na e impresion cu actualmente pues cu e cantidad di pashentnan nobo mester a subi.
Gran parti di pashentnan tin 50 aña of mas, pero melanoma, cual ta e version maligno y pues mas mortal di cancer di cuero, ta mas comun den hendenan muhe entre 20 y 40 aña di edad. For di e total di pashentnan di cancer di cuero na Aruba 3% tin melanoma. E estadistica aki ta klop cu e cifranan mundial.
