No tin servicio di Gobierno responsabel pa ehecuta e responsabilidadnan di un Ministerio pa Desaroyo Sostenibel. No tin personal, ni un presupuesto.

Hasta e reportahe di e SDG’s cu ta e Sustainable Development Goals cu Aruba a compromete na dje tabata cay bao Ministerio di Finanzas, mientras cu Direccion pa Asuntonan Economico, Comercio y Industria tabata encarga cu ehecucion. E Comision SDG tabata cay bao Ministerio pa Desaroyo Sostenibel, pero mirando cu limitacionnan riba entre otro e reportahe di SDG na Nacionnan Uni, e Minister mes no tabatin ningun control ni algo di bisa riba e comision. Esaki ta locual e ex Minister di Enseñansa dr. Armando ‘Rudy’ Lampe a bisa den su documentonan di transicion, cu el a entrega na diferente Minister cu awor a tuma encargo di su tareanan anterior. E realidad di un Ministerio di Desaroyo Sostenibel awor ta hopi cla pa e Minister nobo.

Y ta pasobra cu e no tabatin ni presupuesto ni un departamento pa ehecuta e maneho, e trabaonan riba e tereno aki tabata limita, segun e splicacion den e documento cu ta mucho mas amplio cu locual e ex Minister a presenta siman pasa durante su conferencia di prensa di despedida.

Asina a splica cu TNO Caribbean a cay bao e Ministerio pa Desaroyo Sostenibel, relata na ciencia y desaroyo sostenibel. Pero pa motibo di costo halto, a dicidi pa no continua cu e acuerdo di cooperacion entre Pais Aruba y TNO, cu a keda firma durante Gabinete Mike Eman II. Lampe a entrega tur e rapportnan di TNO Caribbean na su sucesor.

Loke si el a continua cune di e Gobierno prome cu su periodo tabata e asina yama Sustainable Education Symposium, SES, cu tabata un nomber nobo pa e Green Conference. A organisa e SES den colaboracion cu Biblioteca Nacional Aruba. E prome SES, na 2018 tabata dedica na Matanan Medicinal Local y esun di 2019 a trata e tema di Hofi di Bario.

Segun e ex Minister, el a tuma e iniciativa pa presenta un vision cu mester guia como liña pa tur Ministerio, cu el a titula Vision Economia Circular 2050, cu tin como mensahe cu e palabra nobo pa desaroyo economico ta economia circular.

E por a organisa tres conferencia internacional na Aruba riba e tema di desaroyo sostenibel, cu ta inclui e Foro di Economia Circular di America, durante cua a presenta formalmente e maneho di Economia Circular 2050.

Reflexion y perspectiva

Ademas di henter un documentacion riba tur e trabaonan haci, tambe a inclui un reflexion y perspectiva riba e problemanan cu a topa y cu den futuro por empeora. E prome ta e independisacion di enseñansa publico cu ta e solucion pa e problematica cu e Minister di Enseñansa ta encarga cu maneho general di enseñansa y ademas ta directiva di scolnan publico. E ta un reto cu e siguiente Minister mester atende cune, mescos ta trata e igualdad cu otro directivanan di scol cu ta ricibi subsidio.

Independisacion di e Centro Multidisciplinario, MDC, pa asina por resorta esaki bao Fundacion Respaldo ta keda tema di discusion den e Gabinete actual, pa asina por fin por establece un liña preventivo continuo for di momento cu un mucha nace te cu ora cu e caba scol, pa asina cuido mental por haya su luga por fin. A raiz di e morto tragico di Eugene y Rishandroh, e Ministerio bao Rudy Lampe a organisa e congreso ‘Broken 2018, Child Abuse and Violence, Clinical, Forensic, Psycho-social Patterns for Recognition, Detection, Intervention, Prevention and Protection.”

Pero locual realmente tabata e punto mas abao di su añanan como Minister ta e casonan grandi di fraude den enseñansa, y esun mas grandi, cu ta e problematica di SKOA unda contra ley, a pone un peso di 10 miyon florin riba Gobierno. Otro ta e hecho cu Inspeccion di Enseñansa a pone Colegio Nigel Matthew bao curatela, despues cu diferente investigacion a ilustra inconsistencia cu oranan di les cu tabata encontra di bienestar di alumnonan. A cambio algun docente tabata probecha di e situacion.

Lampe ta spera cu proyectonan di innovacion denter di enseñansa por continua, pasobra sin innovacion tin morto lento. Mester sigui cu inversion den personal y introduccion di un recompensacion segun prestacion, mara na cursonan continuo y trabao boluntario pa scol. Y pa cumpli cu e necesidadnan di un mundo cu ta bao presion di cambio di clima, sistema di enseñansa mester enfoca riba proteccion di naturalesa y mester sirbi desaroyo sostenibel. P’esey bao su maneho, algun scol a cuminza cu hofinan comunitario y tambe ‘green houses’ (invernadero) pa asina siña muchanan pa planta pa futuro.

E documento ta hopi amplio y lo haya mas atencion den e siguiente edicionnan di Bon Dia Aruba.