E sugerencia pa introduci votacion pa medio di sistema digital ta concretamente poni den un carta cu Director di Registro Civil y Censo Sharin Luydens a skirbi pa Prome Minister Evelyn Wever na 2019. E recomendacion di mr. Luydens a bin a base di un reunion cu tabatin cu Promer Minister Wever Croes pa analisa eleccion di 2017.
Promer Minister a pidi Registro Civil y Censo pa recomendacion a base di e memo ‘Algemene Knelpunten verkiezingen en nodige wijzigingen ter waarborging onafhankelijkheid en verbetering efficiency,’ esta problemanan general pa eleccion y e cambionan necesario pa garantisa independiencia y mehoracion di eficiencia.
E recomendacionnan aki a bay den un carta pa Parlamento dia 16 di Augustus 2019, unda mr. Wever Croes a informa di kier conversa cu e organo legislativo riba e recomendacionnan y haya sa kico ta opinion di Parlamento riba e tema.
Segun e documentonan, Registro Civil y Censo, cu ta encarga cu implementacion di eleccion, a señala un serie di problema.
Esakinan ta e organisacion y constelacion di e Conseho Electoral, e registro di votador, metemento politico den servicio y trabao relaciona cu eleccion; conocemento di comunidad en general; conocemento di e miembronan di e urnanan electoral; falta di urna electoral; y e sistema di votacion mes cu no ta mas di e tempo aki y cu ta ora pa bira digitalisa y renoba.
Varios recomendacion
E documento cu a bay pa Prome Minister ta elabora ampliamente riba e siete areanan cu segun Registro Civil y Censo ta problematico. Pero esun cu mas a capta atencion tabata e conteo digital. Manera ta conoci Registro Civil y Censo a informa un grupo selecto di medio di e introduccion di un tipo di conteo digital, unda lo mester scan cada biyete di votacion. Bon Dia Aruba no tabata invita pa e presentacion, pues ta a base di locual a keda publica riba Caribisch Netwerk a haya conocemento di e intencionnan aki.
Cansancio
Den e documento mes, Registro Civil y Censo ta informa Promer Minister cu durante ultimo eleccionnan a dura hopi largo promer cu por a determina resultado final di tal eleccion.
Motibo di esaki ta cu e conteo tabata bay cu hopi dificultad. Ya no ta cuestion di conta 20 a 30 mil biyete di voto manera tabata e caso antes, sino mas bien tabata yega na 60 mil.
E contamento ta sucede pa e propio miembronan di e urna electoral cu ya ta cansa pa motibo di a traha oranan largo durante dia. Ta hende cu mester cuminza prepara e urna electoral pa 5or di mainta y e votacion mes ta caba pa 7’or di anochi, y apenas despues mester bay conta e biyetenan.
Contador adicional
Na Hulanda y Corsou, pa e mesun motibo aki, a dicidi pa haci uso di asina yama contadornan, apesar cu e ley di eleccion (Kiesverordening) no ta papia di e grupo aki, ya cu segun ley, unicamente miembronan di e urna electoral ta permiti pa keda den e espacio.
Pero, apesar di ta usa contador, e experiencia na Corsou y Hulanda a mustra cu e proceso di conta e votonan no ta haci e sistema mas eficiente. E proceso cu e formulario of biyete di votacion, esta e stembiljet, y e conteo na man ta simplemente bisa, ineficiente y anticua. Y no ta di e tempo aki mas, segun e informe.
E posibilidad pa haci fout ora di conta na man a bira mas grandi cu tempo, mirando cu e cantidadi di persona cu ta vota no ta bay bira mas chikito.
Como tal, Registro Civil y Censo ta recomenda pa Aruba pasa pa votacion digital cu ta produci un prueba di papel, mescos cu ta e caso na Belgica.
Conseho Electoral
Otro recomendacion ta cambio di e constelacion di Conseho Electoral. Den e carta pa Prome Minister Evelyn Wever, director di Registro Civil y Censo Sharin Luydens ta kere cu mester cambia articulo 5, inciso 3 di e Ley Partidonan Politico, unda ta haci cambio den e derecho pa partidonan cu saca asiento den Parlamento nombra miembro den Conseho Electoral.
E sugerencia ta pa haci Conseho Electoral completamente independiente, cu miembronan cu ta profesional y cu afinidad huridico. E trabao mester bira uno paga y cu su propio Secretariado.
Consecuentemente ta recomenda pa Conseho Electoral haya un secretariado permanente cu por duna sosten e ora na organo, cu mester tambe su propio presupuesto. Registro Civil y Censo ta duna sosten na e trabaonan di Conseho Electoral pero no ta e instancia encarga pa ehecuta esakinan.
Presidente di Conseho Electoral Dr. Glenn Thode lo duna un splicacion riba e desaroyonan y atende e confusion cu a lanta encuanto e plan pa scan e biyetenan di votacion, durante un conferencia di prensa diaranzon venidero.
Bon Dia Aruba lo amplia riba e recomendacionnan di Registro Civil y Censo, cu ta toca varios area di e proceso di eleccion na Aruba.
