Recientemente, A.T.A. a presenta na un manera exclusivo e documentario di “Blue Lizard Effect,” cual a describi den un comunicado di prensa como “un serie documental revolucionario cu ta profundisa su mes den e mundo fascinante di Aruba, pero di un angulo diferente; e serie ta explora e concepto energetico di felicidad y e conexion profundo cu e cultura, e hende, y naturalesa di e isla ta provee pa cu esaki.” Sinembargo, entre comunidad local, e documentario aki a genera indignacion.
A.T.A. a duna e siguiente sinopsis di e documentario: “Protagonista Jason Silva, un personahe renombra den e mundo di television, conoci pa su storytelling, orador di diferente conferencia importante, y creador di pelicula, nomina pa Emmy, ta na un momento puntual di su bida y ta en busca di un transformacion y den mihor compronde e esencia di un bida feliz. Jason ta haci esaki na Aruba pa haya sa e motibo dicon e ta ser yama E Isla Feliz. E motibo di felicidad di su habitantenan y con e por siña di cada un di e personanan cu e ta encontra y con esaki por yud’e pa asina e tambe por logra e transformacion personal.”
Riba rednan social, hendenan influyente den comunidad local a reacciona riba e documentario aki, algun cu comentarionan menos positivo. Ex-periodista A.R. a critica cu “Aruba ta bendiendo su producto turistico como uno unda turistanan por bin relaha, ‘haya nan mes’ y drecha nan salud mental usando nos recursonan natural, nos paisahe, nos awa…Mientras cu nos localnan mes ta letterlijk matando nan mes di desesperacion, sinta pega den un wachtlijst di AÑAS pa wordo atendi na Respaldo, bibando den un fierno di un comunidad chikito y cera den cual nan tin cu busca un manera pa biba anto sin caminda pa nan mes relaha y disfruta, pasobra unda cu nan bay ta pesta di e mesun turistanan ey y pasobra nan si sa cu e mesun lama cu antes tabata kita nan ansha, ta yena cu [excremento] di bishitante cu riba dje a bin pa zogenaamd ‘heal’ den e awa ey.” Asina el a destaca e sentimento cu ta biba entre algun ciudadano local, unda ta sinti cu e imagen cu kier presenta di Aruba en exterior no ta cuadra cu e realidad cu ciudadanonan ta biba dia pa dia. “Si bo puntra ami, e real ‘Blue Lizard Effect’ ta con zonza e local ta sinti di tanto depresion, cansancio, self-medication of e recept di Paxil cu nan a haya porfin…” el a conclui.
Otro usuarionan tambe a reacciona cu e mesun sentimento. Usuario M.W. a comenta: “Calidad di bida ta fo’i balans y ta di nivel deficiente pa mediocre y pa mucho hende hasta malo. Echt! All lights on, nobody home.”
“[Danki pa bisa/declara esaki!] Nos comunidad ta full bao un [control mental/manipulacion] cu a cuminsa di 1986,” usuario D.D. indica, agregando den otro comentario: “Nan ta promove algo cu 98% di nos mes no por biba den nos mes un cas riba nos isla! E blue lizard, nos kododo blauw tin cu proteh’e [pasobra] casi no tin mas pa via di e mes un over tourism effect cu boso ta bezig cune!”
Mester remarca si cu esaki tabata algun di e comentarionan riba e anuncio di e documentario, y no ta representa e opinion di henter e poblacion. Otro usuarionan a elogia e idea di A.T.A. pa bin cu e documentario y a mustra positivo y anticipando pa mira esaki.
