Awe ta wordo transmiti for di 3or pa 4or atardi un documental via Tele Aruba dedica na e conocido ciudadano Frans Antonio ‘Fa’ Croes , kende diahuebs ultimo a cumpli 100 aña di existencia.
E documental aki a wordo traha recientemente pa e linguista y gestor cultural Mirto Lacle, kende a declara na Bon Dia Aruba cu den e documentario aki Fa Croes ta relata tempo cu e tabata mucha, adolescente y su madurez. E documentario ta wordo yama Rescate di Memoria Homenahe na Frans Antonio Croes cu su 100 aña di bida.
Tambe e documentario aki ta referi riba un parti tristo y sentimental di su bida ora cu el a perde su señora na un edad relativamente jong. Ta trata di Aura Croes (d.f.m.) kende a bay Merca pa bay studia pa pelukeria, caminda el a habri su negoshi den e prome hotel Caribbean Hotel na aña 1959.
E documental aki ta yen di spiritualidad tambe ya cu sra. Fa Croes ta haya cu su forsa pa yega na un siglo di bida ta debi na su fe grandi pa Señor. E ta core auto ainda y tur diadomingo e ta bay misa. Tambe e ta haya cu amor y disciplina pa trabou a yud’e pa e cumpli e edad aki. El a yega di traha na Lago, tambe el a traha den aparato gubernamental te ora cu el a dicidi di lanta su propio negoshi di importacion y exportacion di productonan relaciona cu mundo di beyesa y pelukeria.
E documentario aki ta un testimonio di bida cu ta laga un enseñansa su tras di perseverancia. Ya cu sr. Fa Croes no solamente a perde su casa sino cu el a keda huerfano. Ya cu como mucha di 10 aña so su mama a muri y el a bay interna pa sigui su estudio na Corsou. E tabata un temporada duro pe di hopi sacrificio ya cu na edad tempran e mester traha. Te hasta un accidente laboral casi a costa su bida. Tur esaki lo wordo presenta durante e documental aki di casi un ora dedica na sr. Croes, diadomingo awor pa 3or atardi y transmiti pa Tele Aruba.
