E aña aki hospital a conoce diferente desaroyo y entrante otro aña, e lo drenta den un era mas moderno. Director di e instituto hospitalario aki sr. Ezzard Cilié a declara na Bon Dia Aruba cu berdaderamente hospital a conoce diferente actividad durante e aña aki entre nan e trabou di renobacion y expansion di su edificio.
A pesar cu e trabou ta mita di caminda, sr. Cilié a bisa cu otro aña nan ta bay habri cu full otro actividad cu ta biniendo. Ya cu e echo cu nan ta na caminda pa un entidad nobo of un hospital fisicamente nobo, ta exigi cu nan mester ta prepara pa esey.
Pa otro aña parti di e localidad cu ta wordo renoba lo ta den funcionamento, pero esaki lo tuma luga casi na fin di 2016. Hospital ta bay haya un compleho di sala di operacion di seis camber. Esaki ta na caminda pa wordo aproba den Parlamento. Pa fin di proximo aña ya caba sr. Cilié a anuncia cu hospital lo tin un compleho di sala di operacion nobo nobo cu facilidad di ekipo moderno. E paso aki pa hospital ta un adelanto hopi grandi. Esey ta encera e parti di radiologia cu tambe lo wordo mehora y hiba na un nivel mas moderno di locual nos tin aworaki.
El a indica cu tur locual ta tumando luga recientemente entre otro e cambio di status di laboratorio nacional cu a bira un fundacion bou guia di hospital, ta parti di e preparacion pa e era nobo di hospital. Un echo cu e ta considera di relevancia ta esun di bin cu un sistema di documentacion electronico. “Bo mester imagina cu tur loke aworaki ta sosode ta sosode manualmente. Unabes cu bo ta automatisa esey, bo ta bay nota un cambio”, el a bisa.
Documentacion electronico
Sr. Cilié a bisa cu nan ta organisando actividadnan cu tin di haber cu un hospital fisicamente nobo, pero tambe pa no bin cu e mesun tradicion y intencion di ideanan bieu den un instituto di salud. E ta sinti su mes orguyoso di por scucha fei e bishitantenan cuanto nan ta bin haciendo, pero e ta calcula cu pa otro aña te hasta e pashent lo bay nota e cambionan. Algo cu nan lo pone atencion otro aña tin di haber cu e parti di documentacion electronico cu ta un inversion hopi grandi y pronto lo cuminsa tuma luga. E tipo di inversion aki ta bay hiba hospital pa hisa e nivel di calidad y siguridad di un pashent di locual “awor so nos por soña cun’e”, asina director di hospital a declara.
El a papia di e bentaha di e sistema aki. Sr. Cilié a splica cu unabes cu e sistema di documentacion electronico lo wordo introduci nan por tin acceso directo na e file di e pashentnan masha lihe. Ademas den e mesun momento ta wordo preveni di comete fayo.
Tambe e personal lo por traha cu mas actividad pa motibo cu tur informacion di e pashent ta automatisa. Pues esaki lo permiti entre otro cu den un caso di urgencia, personal di hospital cu ta bay atende bo lo tin record mesora di bo, locual no ta e caso actualmente. “Entrante otro aña tur e problema ey lo wordo elimina y no lo existi mas”, el a bisa.
