Docentenan di scol Pius X na Dakota a dicidi di bay den accion awe mainta tempran pa motibo di e calor cu nan mester soporta pa mas cu un aña. Pero particularmente durante e dianan aki, specialmente den oranan di merdia. P’esey awe nan a bisa: Ta basta!. Nan a laga sa cu e scol no tin airco; y bentananan cu a wordo instala apenas un par di aña pasa no ta traha bon. Nan a laga sa cu personal di DOW a bay check e bentananan, pero nada no ta wordo haci.
Cabesante di scol, Sheila Tromp a declara cu e cuerpo di docente a cansa di duna les den e situacion dificil di calor cu nan y nan muchanan ta pasando aden. Aunke nan no a manda e muchanan cas, nan a dicidi keda pafo di e klas wardando un reaccion di minister di Enseñansa.
Directora di SKOA, Sra. Daal a presenta na scol y el a declara cu e preocupacion aki “no ta di awor”. El a bisa cu na 2010 gran parti di scolnan cu ta resorta den SKOA a haya e proyecto di e bentana nobo. Pero e directiva di scol a yega di expresa for di e tempo aya caba cu nan no ta contento cu e material di e bentana y porta; y den e caso di Pius X e material di e bentananan no a resulta. “Despues di tanto aña, nan tin problema. E bentananan no ta habri y porta no ta habri”, el a laga sa. Nan ta spera di un pronto reaccion di ministerio di Enseñansa pa atende e situacion aki.
