Despues di reunion ‘hopi tenso’ cu minister siman pasa

Diahuebs anochi siman pasa tabata tin un reunion cu minister di enseñansa na SEPPA relaciona cu cambio den Dienst Publieke Scholen pa un fundacion. Un docente ta conta nos cu esaki a bay basta tenso y e presentacion di powerpoint cu a wordo duna tabata ‘bunita pero tin hopi duda entre docentenan’.

“E reunion ey a bay hopi pica. E cos ey tabata un warzone. Pregunta tras di pregunta tabata wordo lansa den direccion di e minister y hopi cos e no por a contesta. Hopi docente tabata boca habri cu e no por a contesta nos preguntanan. Nan a bolbe bisa e anochi ey cu nada no lo cambia. Cu nos no lo perde posicion como ambtenaar den e fundacion cu nan kier bay haci”, un docente ta splica Bon Dia. Nos a compronde cu diaranson atardi lo tin un otro reunion na SEPPA cu nan abogado hunto cu e 1070 miembronan di DPS pa mira unda nan ta para legalmente. “Nos mester bin hunto y forma un bloke pa nos bringa pa nos derechonan.”

E pregunta primordial lansa na e mandatario encarga cu enseñansa siman pasa tabata pa kico kier haci un stichting si tur cos ta bay keda mescos. Segun e docente, e ehempelnan cu a wordo duna ta hopi kens, entre otro relaciona cu buki y cosnan asina. E docentenan ta mira cu e cambio aki lo kita tur nan derecho unda cu por ehempel bo no lo traha mas pa Land Aruba pero pa un fundacion. “Bo derechonan na un fundacion no ta mescos cu na un gobierno”, un otro docente a reclama.

Puntonan di preocupacion
Manera nos a trece dilanti, e docentenan ta preocupa cu si DPS bira un fundacion, bo lo tin cu bay tuma retiro di trabao actual pa solicita un nobo. Y si nan tuma bo lo tin cu bay un proeftijd a pesar di bo añanan largo di trabao den vastedienst.

Si no tin suficiente ora pa e vakdocenten, si nan kier manda bo cas of cambia bo di scol nan lo por haci e sin cu bo kier. E directiva cu lo wordo nombra pa minister den caso di traha e stichting aki, lo por tambe yega kita bo for di trabao compara con cosnan ta na momentonan aki. Nan no lo por pleita nan caso tampoco si algo bay robes; no lo por busca un abogado ni bay hues (Artikel 2-b Landsverordening Beindiging Arbeidsovereekomsten Aruba.)

“Salario no ta tur cos, nan por ofrece nos mes salario of mas halto, contractnan cu beneficio etc. pero djis e echo cu ta asina mas facil pa kita nos di trabao, nos no tin cu acepta e cos aki”, un docente a comenta riba rednan social.

‘Problema no ta salario’
Siman pasa a bin dilanti cu e decision ta den man di e docentenan; si nan ta bay den e fundacion of keda ‘ter beschikking’ di DPS manera ambtenaar. Pero si tur 1070 docente bisa cu nan no ta bay un fundacion, con tur ta bay keda ‘ter beschikking’ pasobra unda nan ta bay traha luga pa nan, segun un docente ta splica nos.

“E no ta salario pasobra segun minister tur bo beneficionan ta keda. Pero bo tin cu kita y minister ta bisa cu nada no lo pasa pasobra bo tin cu firma un contract. Bon, bo ta firma contract cu salario ta keda mescos y bo ta keda cu bo mesun oranan. Pero si despues nan dicidi di haci algun cambio den statuut? Pues nos tin hopi duda.”

Docentenan ta bisa cu djis e echo cu nan no ta bay tin e LMA (ley di ambtenaar) pa cubri nan lomba, esey lo ta suficiente pa no pasa pa un fundacion. Pasobra na momentonan aki pa kita un docente for di trabao ta hopi dificil y ta rekeri un proceso hopi largo unda na final minister ta dicidi. “E directiva nobo na e fundacion aki lo consisti di coleganan y cabesante cu si nan no gusta bo, bo ta perde bo trabao. ”