Un biaha mas sector di enseñansa a bay den accion dilanti di Bestuurskantoor y tambe dilanti Parlamento ayera mainta, caminda nan a wordo ricibi pa presidente di e organo legislativo, Juan Thijsen.
Un grupo di docentenan di Emmaschool a bay expresa nan malcontento pa medio di un manifiesto entrega na minister presidente, Evelyn Wever-Croes pa medio di e representantenan sindical di SIMAR y SEPPA, contra e cambionan cu e mandatario di enseñansa kier bin cune. Un cambio tin di haci cu e mandatario kier bin cu un management team y tambe fusering e scol aki cu otro scol, esta cu scol Paso Pa Futuro.
E plan cu e mandatario ta esun di uni ambos scol pa nan bira uno bou e nomber di Scol Soeur Juliette. Ya caba un plan a wordo traha pa drecha infrastructura di Emmaschool pa e bira hunto cu Paso pa Futuro un solo scol den honor di soeur Juliette kende a dedica hopi aña di su bida na enseñansa.
Sinembargo e docentenan a expresa nan disgusto ya cu Emmaschool tin 66 aña di existencia, y nan ta haya cu e scol aki lo perde su propio identidad. Mientras di otro banda e mandatario kier bin cu un management team pa reemplasa nan cabesante di scol. Sinembargo tin indicacion cu e cabesante di Emmaschool kende a dedica añas na servicio di enseñansa ta preparando su solicitud pa baha cu pension.
E accion aki a conta cu presencia di trahadonan di fundacion Ambiente Feliz cu a bay sostene tambe e accion di e maestronan di Emmaschool. Tambe nan a expresa nan malcontento pasobra nan no a ricibi pago ainda di nan bashi premie. Un derecho adkiri y cu no a wordo honra cu nan pago.
