Ayera den oranan di mainta, docentenan di Colegio San Nicolas (CSN) a manda un carta na minister di Educacion, Armando ‘Rudy’ Lampe, den cual nan ta exigi pa duna un comunicado di prensa por escrito den cual ta aclaria cu e datonan cu minister a usa no ta klop y ta engañoso.
E docentenan a expresa cu nan kier solicita pa minister manda un comunicado di prensa por escrito den cual ta aclara cu e rapport di investigacion cu fecha 24 di november su contenido no ta valido, cu no tin base, y cu ta engañoso pa pueblo Arubano, ademas cu a pone e docentenan mustra malo.
Ademas, igual cu dialuna, ayera tambe nan a pidi pa un reunion pa papia cu representante di DPS y di bureau di minister. E docentenan a indica cu solamente Inspectie Onderwijs a tuma contacto cu nan pa un reunion cu cuerpo di docente.
Den e carta e docentenan a duna Lampe te cu merdia di ayera pa manda dicho comunicado y acorda e reunionnan cu a solicita.
E carta, cu a conta cu firma di tur docente presente, a ser entrega personalmente na miembronan di MT, kendenan a firma pa su recepcion.
