Docentenan di EPI unidad C&T, ta sumamente desapunta cu e entrevista ultimo di minister di Enseñanza Armando Lampe, a haci via medionan social, caminda di un forma repugnante ta trata na crea un impresion como si fuera docentenan no ta trahando na servicio di nan alumnonan.
Docentenan y conhunto cu departamento di scolnan publico (DPS), directiva di EPI , managernan di unidad C&T a yega na un solucion temporal pa un problema cu ta andando actualmente. Nan no a spera cu despues di e acuerdo aki cu minister Lampe, cu na niun momento tawata presente durante e reunion di e partidonan menciona, dos dia despues a yama prensa pa duna un declaracion usando ‘leerling staat centraal’ como arma pa haya simpatia y trata na mancha integridad di docentenan aki. Esaki ta segun e comunicado cu nos a ricibi.
Den e caso specifico aki docentenan por prueba cu nan kier y ta traha pa alumnonan dor cu ta hustamente nan a pone enfasis y ta luchando duro pa soluciona un problematica structural cu ta andando ya pa mas di 20 aña consecutivo. Pa e docentenan esaki ta inaceptabel paso e organo mas halto di educacion, durante tur e añanan aki no tawata capaz di ahusta y mehora dicho structura.
E minister no ta para tras di loke e mes a pone den un carta dirigi na e docentenan, y e minister aki ta cambia di palabracionnan y posicion pa loke ta conduci na confusion- y frustracion. Ta claramente bisto cu na luga di e minister asumi su responsabilidad, di un forma baho ta trata na schuif esaki un banda puntando awo, di un dia pa otro, dede riba docentenan.
Un otro ehempel di e maneho controversial di e minister actual ta durante di su rondanan encuanto independisacion di DPS caminda e no tawata riba un liña den su presentacionnan. Consecuentemente su empeño pa si independisa EPI a crea un esfera amargo bao di docentenan di unidad C&T.
