Docente y mayornan preocupa pa guia di cuarentena confuso pa muchanan 0-12

Alumnonan riba 13 cu ta den cas cu personanan infecta cu coronavirus, mester tene cuarentena. Pero, muchanan bou 13 cu ta biba den famia cu tin e virus, por bay scol, y asina cu bolbe cas, keda den cuarentena.

E instruccion di DVG aki a crea un situacion hopi confuso y hasta tin docentenan pa no papia di mayornan, cu ta hopi indigna.

E guia ta bisa cu cualkier alumno, for di baby te na adolescente, como tambe lidernan di crèche, y docentenan di scol primario y basico, y educacion secundario, cu tin sintoma mester bay nan dokter di cas, pa haci un test. Den caso cu nan ta positivo pa COVID-19, nan mester keda cas.

Scolnan no por permiti ningun mucha of persona cu ta visiblemente malo, drenta e edificio of espacio di crèche of scol.

Den caso cu e mucha of alumno tin un familiar den cas cu ta den isolacion pa motibo di COVID-19, e regla ta pa e mucha tambe bay den cuarentena di 10 dia despues di e ultimo contacto cu e persona infecta. Si no por isola di e persona positivo cu coronavirus, e cuarentena ta cuminza 10 dia despues cu e persona en cuestion mehora. Durante e periodo aki, adolescentenan riba 13 aña no por bay scol, pero muchanan bou 13 si.

E muchanan bou 13 por bay scol pero lo mester bolbe den cuarentena asina cu bay cas. Den otro palabra, otro cu scol, nan no por bay ningun otro caminda.

Muchanan, alumnonan y docentenan cu ta wardando resultado di nan test no por bay nan scol of instancia.

Den caso cu Minister bin cu un areglo mas stricto, esey lo prevalece.

E punto di salida ta cu Servicio Malesa Contagioso, DBZ y Servicio Cuido di Salud Hubenil, JGZ di DVG ta e unico instancianan cu ta autoridad pa pone esnan cu ta den e sector di enseñansa den cuarentena. E paso pa pone muchanan y alumnonan den cuarentena lo ta specifico, basa riba contacto y casonan di excepcion, basa riba grupo y klas. Unicamente e team di maneho lo por pone klasnan of scolnan completo bou cuarentena. DBZ y JGZ lo por desvia unicamente den deliberacion cu e team di maneho.

Pa esnan cu nan test ta mustra cu positivo zwak, ta bin un periodo di isolacion di tres dia. Despues di tres dia ta evalua di e persona en cuestion a desaroya kehonan. Si esey ta e caso, e mester bay den isolacion. Si despues di tres dia no tin sintoma, lo bolbe test e mucha, alumno y/of docente. Si e resultado ta positivo, anto ta hiba un maneho di 7 dia adicional den isolacion. Pues, 10 dia despues di e fecha cu a test. Si e resultado ta negativo, of ta positivo pero debil, e por ta un infeccion bieu y ta lanta e isolacion. No tin un obligacion pa cuarentena pa personanan cu den menos di tres luna a test positivo. Lo ahusta e medida aki segun evaluacion y si mester.

Procedura crèche, Scol Primario, Basico y otro

JGZ y DBZ ta encarga pa investiga e contactonan y fuente di infeccion si un mucha, alumno of docente di alumnonan di 12 aña bay abou resulta positivo. Si e docente ta positivo, muchanan por sigui bay scol basta cu tin un reemplasante. Pero e muchanan cu tabatin contacto cu e lider of docente positivo, mes mester keda den cuarentena asina cu nan bolbe cas. Ta trata aki si tabatin contacto pa mas di 15 minuut den un distancia menos cu 1.5 meter.

Segun DVG ta trata aki unicamente muchanan cu tabatin contacto 48 ora prome cu e docente of lider a cuminza haya sintoma te 10 dia despues. Como tal, DVG a dicidi muchanan te cu 12 aña y a test positivo, mester bay den cuarentena.

Pa mas precaucion a dicidi tambe cu lo tin cuarentena obligatorio pa lider y docentenan cu ta forma parti structura di e klas unda e mucha positivo tabata of tabatin contacto fisico cu e mucha, y tambe lider y docente cu denter di 48 ora prome cu e sintomanan di e malesa a manifesta cerca e mucha tabatin contacto cune. Nan tambe lo mester bay 10 dia en total den cuarentena.

Pa loke ta muchanan mes cu tabatin contacto cu otro mucha cu a test positivo, si nan no tin sintoma nan por sigui scol, pero unabes na cas mester tene cuarentena. E periodo di cuarentena ta 10 dia despues di ultimo contacto cu un persona positivo.

Muchanan cu ta positivo pero sin sintoma ta keda 7 dia den isolacion y si no desaroya nada, nan por bolbe scol despues. Esnan cu tabatin contacto cu e mucha no mester bay den cuarentena.

Di otro banda, muchanan di 13 aña bay ariba si lo mester bay den cuarentena si nan tabata den contacto cu un alumno y/of docente cu ta positivo. Aki e periodo di cuarentena ta 10 dia tambe. E decision pa hobennan asintomatico sinembargo ta cu nan mester keda 7 dia den isolacion, pero nan contactonan no mester bay den cuarentena.

Pa hopi mayor y hasta docente, e guianan aki ta sumamente confuso y hasta algun ta sinti cu e ta peligroso. E hecho por ehempel cu un mucha cu ta menos di 13, y ta den cas cu un persona positivo, toch mester bay scol ta crea hopi incertidumbre y algun maestro a expresa nerviosismo pa nan propio salud. No ta compronde e medidanan aki y algun mayor tampoco. E pregunta ta pakico ta permiti un mucha bay scol, pero despues di scol si e mester keda na cas. Henter e ehercicio ta pa no plama e virus. Si e mucha ta asintomatico, e por hiba e virus scol y pas’e pa otro mucha cu na nan turno por infecta nan mayornan y hasta e docente.

“Nos no ta compronde cu SIMAR y hasta e Minister di Enseñansa ta permiti e situacion insigur aki,” ta e comentario cu Bon Dia Aruba a ricibi.