Bon Dia a sinta cu Docente di Historia na Colegio Arubano, sr..Ivan Yarzagaray kende ta splica cu tin en berdad un malcontento enorme na Colegio actualmente despues di a cuminsa diferente sorto di cambionan.
”Mi a cuminsa traha na aña 1997, pues mi tin basta tempo caba na Colegio. Mi a traha cu diferente rector, docente y alumnonan claro pues mi tin basta experiencia. SMOA ta pone nos riba pia robes, fuera di trece cambionan cu den mi opinion a totalmente fracasa, pa motibo di tur esaki y cu ta prefera hende di Hulanda na luga di Arubiano nos ta haya esaki ta trece hopi malcontento entre nos y e trabao ta wordo haci sin smaak pasobra nos ta sinti cu nos no ta wordo aprecia” , sr. Yarzagaray ta splica.
Pa locual ta e cambio di rector, sr. Yarzagaray ta agrega cu a manda busca persona for di Hulanda y a priminti cu e no lo bay patras den salario. Na Hulanda, un salario pa rector ta den Euro, pues segun sr.Yarzagaray eynan nan a spera cu cos ta bay pega. ”SMOA ta bisa cu nan no a interpreta Minister su intencionnan bon, y parce cu Minister tabata dispuesto. Despues a resulta cu Minister no tabata nada dispuesto, kemen nan a firma cu e homber ki cu casi 15.000 florin pa luna plus ahustacion cu e mester haya sin tin aprobacion di Minister” sr. Yarzagaray ta bisa. Sr. Yarzagaray ta agrega cu Minister a bisa cu no por paga un rector di Colegio Arubano 15.000 florin anto un rector di universidad di Aruba mester keda pag’e 8.000. ”Eynan e batata cayente eigenlijk a cay den nan scochi cu finalmente, ya, nan a baha na awa! Nan a tuma retiro. Nos a tende di directiva cu supuestamente paso nan periodo a yega’, nos mes a keda sorprendi paso Bart Kool mes ta sinta mas cu 8 aña caba anto ki dia su periodo ta yega?Nos no a tende ningun contesta satisfactorio anto eynan eigenlijk e rabia a cuminsa bini”, sr. Yarzagaray ta splica.
Segun sr.Yarzagaray ta conta Bon Dia, SMOA a bisa cu nan lo forma un comision di docente y zorg pa informa tur hende di tur e desaroyonan cu ta bay tin. Ni 2 siman despues, sr. Yarzagaray ta agrega, cu nan a tende cu tin un preferencia pa hende di afo. Tabata tin mester di busca un hende di Hulanda pa por a implementa e “Tweetalig Onderwijs” y e “iPad Onderwijs” caminda cu no lo mester di uzo di buki fisico mas, tur buki lo bira digital y muchanan lo mester djis bin scol cu un iPad na luga di un tas yen di buki.
”Na Hulanda, ora bo cumpra buki e ta sali bo ban bisa 30 Euro y si bo cumpra licencia digital di e buki, esaki ta sali bo 25 euro, kemen eigenlijk e pida cu e ta mas barata nos nunca a realmente drenta den dje, pasobra ta casi nada di diferencia. Tambe, mester pone atencion riba nos infrastructura na Aruba, hopi di e cambionan aki ta algo cu ainda ta poco trempan pa introduci akinan” , sr. Yarzagaray ta splica.
E trabao di e ultimo rector na Colegio Arubano tabata pesimo
”E malcontento a bira pio, principalmente despues cu nos a tende cu nan lo termina e relacion di trabao entrante a di april cu e rector anto cu un ”Golden Handshake”. Un homber cu no a funciona ni 8 luna drechi na Aruba anto e ta haya un ”Golden Handshake”? Nos lo bisa cobra su persona tur e cen bek cu boso a paga paso e no a haci nada!” sr.Yarzagaray ta splica.
Sr. Yarzagaray ta agrega cu e reglamento nobo cu nan kier a bin cun’e a bay demasiado leu. ”Nos ta compronde cu kier drecha e Hulandes bao di e alumnonan, pero no por exigi cu no mag papia Papiamento riba plenchi di scol anto si nan no haci’e cu nos mester strafnan. Papiamento ta nos lenga nacional, nos no por haci e cos ki”
Mester hende madura den directorado
”Ami eigenlijk tin dos conseho pa trece union na Colegio. Pa di prome, mester bini cu un rector madura caba, pues un hende grandi.” sr. Yarzagaray ta bisa.
Sr. Yarzagaray ta splica cu mester un hende cu autoridad den funcion di rector na Colegio Arubano pa motibo cu aworaki den directorado, tin persona cu ta hopi mas jong y no ta wordo tuma na serio. E di dos punto cu sr. Yarzagaray kier a trece pa dilanti ta, cu e persona cu mester bira rector na Colegio mester por a studia na Colegio tambe y mester por sa e cultura, locual ta biba na e scol y tur e aspectonan di e scol pa por traha cu amor y confiansa. Tin hopi ehempel segun sr. Yarzagaray manera Chando Pieters cu sigur sr. Yarzagaray a splica e lo firma pe di biaha pa e bira rector y tin hopi otro bon candidato tambe. Esaki ta e dos ingredientenan cu sr.Yarzagaray ta bisa cu por trece hopi cambio positivo.
