Segun relato di Directie Natuur en Milieu (DNM) diamars, 15 di augustus 2017 a drenta na vigor e ley cu ta brinda proteccion na cierto especie di mata y bestia local. Ta trata aki di mata y bestia cu ta na peliger di extincion na Aruba tambe mata y bestia cu ta di balor ecologico pa Aruba.
E departamento ta informa cu e ley cu a drenta na vigor ta forma parti di e Natuurbeschermingsverordening di 1995. E tempo ey caba a cuminsa cu acumulacion di e especienan local cu ta na peliger di extincion of cu tin balor ecologico. Esaki finalmente a termina den e formulacion di e decreto nacional aki.
Desde e dia cu e decreto ta oficialisa ta prohibi pa mata y causa daño na un cantidad di mata y bestia cu ta aparece den e decreto di proteccion flora y fauna local. E decreto aki ta menciona e nomber cientifico y e nomber local. Prohibicion tambe ta encera exportacion, mata y herida bestia of kap mata y mat’e mata cu ta riba e lista den e decreto.
Segun e relato DNM conhuntamente cu AHATA a dicidi di elabora y enfoca ariba 7 sorto cu ta e: Shoco, Prikichi, Cascabel, Coneu, Gutu, Fofoti y Stoki. Por ehempel, for di e 5 bestianan menciona 4 ta den peliger di extincion y e otro ta di balor ecologico. Di e matanan menciona e Stoki, tambe yama Mosterd, ta den peliger di extincion y e Fofoti ta un sorto di mangel cu ta di balor ecologico.
DNM ta clarifica cu ta wordo considera cu un especie tin balor ecologico ora cu e sorto aki ta necesario pa percura cu e ecosistema keda den bon condicion, pues pa otro bestia y mata keda existi. DNM hunto cu departamento di BUVO y AHATA lo sigui traha hunto pa informa y educa e comunidad. A yega na e lista aki den cooperacion cu diferente departamento di gobierno: DWJZ, DNM, DLVV y Veterinaire Dienst, e comunicado ta bisa.
