Riba 22 di september un tanker a pega riba rif na Renaissance Island y a detene e capital cu tabata mas alcohol den su sanger cu permiti. Awor autoridadnan ta informa cu a laga e barco y capitan bay y cu e daño na naturalesa tabata minimal.

Departamento di Naturalesa y Medio Ambiente (DNM) a haci un ‘full investigacion’ asina polis ta informa, pa wak si tabatin daño y siguramente na e rif. Esaki tambe como cu coral na Aruba ta proteha. Segun polis e rapport di DNM di e investigacion ta mustra cu e daño tabata ‘minimal den e area y no tabatin hopi coral’. Polis a manda potretnan tambe di e situacion bou awa.

Ministerio Publico a duna e capitan y compania un boet pa motibo cu tabata burachi na trabou. Durante e 10 dia di investigacion unda e capitan a keda deteni, dado momento Departamento di Scheepsvaart a kita e confiscacion di e barco. Vocero di polis ta remarca: “Danki dios e barco no tawata carga cu zeta y e daño tawata limita na naturalesa.”

E barco ta yama Thayer y normalmente ta carga azeta. Riba 2 di september tabatin 24 tripulante abordo. Segun rapport di polis:  “E capitan S. Singh a declara cu pa 19:30 nan mester a bin na pilot station Barcadera cu ta 1,5 nautical miles leu di tera pa topa cu e supply boat Orion pa haci 1 crew change. Ora e barco Thayer a jega na 1,5 nautical miles e supply boat Orion a bisa nan bin mas cerca pa nan haci crew change. Asina e barco Thayer a keda drief bin mas cerca. Ora cu e barco Thayer a jega na un distancia di 0,4 nautical miles di tera, nan a realisa nan ta mucho cerca y a purba haci maniobra pa evita e barco pega riba rif. Pero esey tawata mucho laat y e barco a drief na un speed 0,4 miles pa ora y bin pega den rif.”

Durante interogacion polis a constata cu e capitan tawata ‘hole fuerte na e consumo  alcohol’. A pidi su cooperacion pa haci un test di alcohol cual el a haci. E la blaas 933 UGL. E di dos biaha e tabata supla 955 UGL. Cual ta 4 biaha mas cu permiti segun Haven en Rede-/verordening di 220 UGL, segun nos autoridadnan.

Bon Dia Aruba kier remarca cu ya nos a publica diferente articulo cu Aruba no ta prepara suficiente pa un calamidad grandi unda un barco di azeta ta lek cerca nos costa. Tur dia tin un gran cantidad di tanker cu ta pasa nos isla carga cu azeta.