Durante conferencia di prensa di Directie Natuur en Milieu (DNM) a anuncia e decreto nacional pa proteccion di flora y fauna local. E director di DNM Gisbert Boekhoudt ta pone enfasis cu pa percura cu e ley no wordo viola, mester informa tur hende riba kico mag y kico no mag. Nos reportero a papia cu sr. Boekhoudt riba topiconan cu ya caba nos a reporta e ultimo simannan, manera entre otro e 6 turtuganan morto riba Eagle Beach.

Un habitante anonimo di Parkietenbos a duna su opinion siman pasa na nos redaccion tocante e mangelnan na e area. Segun e persona, e por wak claramente cu e mangelnan den vecindario di dump ta bay atras cada aña. Segun sr. Boekhoudt, e ley cu a bin na vigor awo ta pa proteha mangelnan, entre otro, pero ‘prome cu esaki matanan y otro especie no tabatin proteccion.’ Sr. Boekhoudt a bisa, “prome cu esaki tabatin algun maneho pa proteha cierto habitat of especie y tambe pa anda cu sushi. Awo cu e ley aki lo tin mas proteccion concreto.”

Sr. Boekhoudt a clarifica cu e maneho y operacion di e dump ta responsabilidad di instancia cu ta ehecuta e tarea aki. Sinembargo awo ‘tin mas instrumentonan solido pa percura cu esunnan cu maneha e dump no causa daño na e naturalesa pafo di e dump.’

Instancia ehecutivo mester tene cuenta cu ley

Sr. Boekhoudt a splica cu esaki ta conta pa tur otro instancia, entre otro instancianan encarga cu tarea ehecutivo di por ehempel turismo of desaroyo teritorial. “E pregunta e ora ey lo ta con e instancianan mes lo anda cu e responsabilidad aki. Nos lo mester warda pa wak con nan ta responde.”

Esnan cu tin responsabilidad ehecutivo mester tene mas cuenta cu e naturalesa awo, segun sr. Boekhoudt. “Tin temporada cu nan no tabata tene cuenta cu cierto cosnan pero awo mester tene cuenta pa nan tin un maneho responsabel.”

Historia di e departamento

Den nos ultimo entrevista cu Edith van der Wal di Tortugaruba, el a expresa cu e maneho ambiental no ta algo cu ta haya hopi atencion di gobierno pasobra antes e maneho di medio ambiente y desaroyo teritorial tabata cay bou mesun departamento. Segun sra. van der Wal, esaki lo por a haci’e mas facil pa colabora y tene cuenta cu e turtuganan.

Sr. Boekhoudt a clarifica cu ‘DNM ta existi pa cinco aña caba. DIP ta existi pa un tiki mas largo cu esaki. E departamento cu tabata existi prome cu esaki tabata Directie Volksgezondheid en Milieu.’ E departamento aki a stop di existi den algun aña den 2000, segun sr. Boekhoudt. “Mayoria di e grupo aki cu tabata encarga cu desaroyo teritorial a bira loke nos conoce awo como DIP. Pero e parti di medio ambiente a keda colga. E colgamento aki a haci cu tur e tareanan a plama.”

Segun sr. Boekhoudt, no tabatin un ‘iniciativa concentra riba medio ambiente den e temporada aki.’ DNM a cuminsa bek cu e trabou cu a wordo laga y awo nan ta ocupa cu crea maneho, sr. Boekhoudt a splica.

Proteccion di marine mammals

Den nos entrevista cu Angiolina Henriquez di Aruba Marine Mammal Foundation a wordo clarifica cu un di e peligernan grandi pa bayena y dolfijn ta e piscadonan. Segun sra. Henriquez e piscadonan hopi biaha ta corta nan netnan y laga nan los den lama. Esaki por causa daño na un criatura cu por haya su mes den e net y por causa su morto.

Di parti di DNM sr. Boekhoudt a splica cu nan ta reuni regularmente piscadonan riba e topico di pesca artesanal. “Nos ta purba conscientisa nan riba kico mag y kico no mag.”

Tambe e fundacion aki a splica cu nan ta ocupa cu un proposicion di un ley of acuerdo unda lo por considera cierto areanan di nos costa como Marine Mammal Sanctuaries. Sr. Boekhoudt a bisa cu ‘Aruba ta parti di un tratado internacional pa cual nos a compromete nos mes na dje, y ta trata cu bayena y dolfijn.’

“E fundacion aki a wordo manda afo algun tempo pasa pa haci e tarea aki. Seguramente e ta cay den liña cu kico nos ta haciendo. Pa haci e santuario aki posibel mester warda pa e proposicion yega pa e por sigui cana e caminda.” Sr. Boekhoudt a sigui splica cu den e ley ta proteha cierto especie pero cu tambe tin espacio pa proteha cierto area cu bayena of dolfijn ta uza. “E ta secuencial, despues di un ta bin e otro. Legislacion mester wordo complementa cu un maneho pa asina nos yega na un maneho ambiental sano.”

Mester conscientisa hende

En caso cu e ley wordo viola, mester constata kico a pasa y documenta e hecho, segun sr. Boekhoudt. “Esaki ta pasa via un proces-verbaal y despues Ministerio Publico ta encarga ora cu mester bay na straf.”

E director di DNM ta finalisa bisando, “Mester sa cu sigur cu no por mata ni herida ningun especie proteha. Tampoco mag di exporta e especienan aki ni piki nan webo.”