Ultimo tempo Departamento di Naturalesa DNM tin accionnan mas intensivo unda ta purba regula mas estrictamente dumpnan ilegal, ademas di e conseho cu a duna Minister pa cera convenio cu EcoGas y resolve e problema cu dump, cual actualmente ta bayendo den direccion di un sistema Waste-to-Energy, un incinerator.
Gisbert Boekhoudt, director di Directie Natuur & Milieu (DNM) ta splica cu tin un Task Force cu ta reuniendo frecuentemente cu Departamento di Milieu, trahando hunto pa cierto reto cu tin na diferente sitio unda lo mester procesa sushi, of ora ta trata di dump ilegalmente riba un tereno.
Boekhoudt ta splica cu pa yega na un seleccion di e metodologia pa procesamento di sushi di un manera moderno mester a tene un RFI (request for information), unda cu a sali na cla cu mayoria di hende y compania cu a bin cu un solucion a scoge ‘Waste to Energy’ cual ta e direccion cu ta tumando.
DNM a conseha pa cera convenio cu EcoGas ‘e compania mas avansa’
El a continua bisa cu ora Ministro di Infrastructura y Medio Ambiente a bay cu e portfolio, el a puntra DNM pa un conseho urgente pa e situacion cu tabatin di urgencia na cuminsamento. “Nos a duna e Ministro e conseho pa un termino corto pa percura pa bay na un termino mediano y largo”, el a expresa.
Pa e termino corto, Boekhoudt a comparti cu mester a percura pa e sushi cu ta caba riba Parkietenbos stop di crece. E bulk cu tabatin eynan ta 70%, cu ta parce cu ta menos e parti di comercio y sushi di cas cu ta dirigi na e compania cu a screennan.
Sinembargo el a bisa cu e compania cu ta procesa sushi cu ta EcoGas ta esun mas avansa. Nan a recomenda Minister pa haci un contract pa dos aña cu e compania pa asina despues sigui pa di e termino corto pa e esun mediano.
Pa locual ta trata e termino mas largo, sostenibel, duradero y moderno. “Esey ta na unda tur hende por opta pa por participa den e proceso, sin cu ningun wordo exclui”, Boekhoudt a splica.
Pa finalisa, Boekhoudt a bisa cu otro parti cu a recomenda Ministro ta pa mantene na e tendencia internacional di economia circular, unda ta enfoca pa tur stap den traha producto of cualkier proceso, no laga nada atras como sushi of ‘waste’.
“Un bes bo tin sushi, e persona tin cu zorg pa esey no cay den dump. Dus p’esey tin compania cu ta absorba y procesa e sushi pa asina traha producto cu lo bira util pa bay bek riba mercado. RFI ta e parti mas duradero unda e recomendacion a sali pa traha un planta di sushi pa energia. Pa haci limpi e gas cu ta bay perdi di dump”, el a finalisa ta splica.
