Un veterano di 10 aña di e Departamento di Polis di Los Angeles, ta enfrentando castigo di bida largo den prizon despues cu e departamento a haci un investigacion tocante acusacionnan di violacion cu a link su persona na otro atake sexual cu no a ser soluciona desde 2015.
William Rodriguez, di 33 aña di edad a ser aresta y acusa cu dos cargo di violacion forsa,cu un acusacion special di multiple victima diamars, esaki e oficina di fiscal di districto di Los Angeles a bisa den un comunicado di prensa. Rodriguez acusa di agredi sexualmente un conoci na su cas na november ultimo.
“Ora un di nos kibra e confiansa di e hendenan nos a hura pa proteha y sirbi, e ta empeña e badge cu nos tur ta carga cu orguyo riba nos pecho”, e Hefe di Departamento di Polis di Los Angeles Michel Moore a bisa den un comunicado. “E aresto aki tambe ta refleha nos compromiso di persigui cada pista, sin importa na unda e hiba e investigacion”.
Polis a bisa cu nan a ingresa e DNA di Rodrigues den e sistema di DNA Index di FBI cu nan a haya un golpi friu den un caso di atake sexual cu a sosode na augustus 2015. E atake aki ta envolvi un otro muhe kende a wordo viola “bou di circunstancianan similar”, e oficina di fiscal di districto a bisa.
“Nos solamente sa di e dos nan aki”, e Capitan di Polis di Los Angeles, Gisselle Espinoza, a bisa Los Angeles Times ora cu nan a puntra si investigadonan ta kere cu por in mas victima. “Pero manera tur investigacion nos lo sigui e evidencianan te unda e hiba nos”.
Rodriguez recientemente a wordo asigna pa e Division di Trafico, segun Polis y ambos atake a sosode ora e no tabata trahando. Actualmente e ta den custodia y a ser retira di su podernan policial.
Fiscalnan a bisa cu nan ta spera cu Rodriguez wordo procesa diahuebs y a recomenda (Bail) na 1.2 miyon dollar. Si e wordo declara culpabel e por enfrenta un sentencia di maximo 30 aña pa bida den prizon estatal.
