Recientemente Departamento di Mucha y Hoben (DMH) a haci un presentacion, e contenido di e ley di Codigo di Proteccion y a elabora riba e importancia di señala sospecho di abuso di mucha, principalmente uzando e herment di “kindcheck”.

E presentacion aki tabata netamente dirigi na e siguiente tanda di instancianan di husticia: Inmigracion Aruba (Instituto Alarma Seguridad Aruba), Dimas Aruba (Departamento di integracion, maneho y admision di stranhero , CMMA (Coordinatiecentrum Mensenhandel Mensensmokkel Aruba) y UNHCR (United Nations High Commissioner Refugees).

Durante e mainta aki, ya algun organisacion ariba menciona a indica, cu nan ta purbando di haya informacion concreto kico ta loke nan mester haci, na momento cu nan encontra un situacion di sospecho di abuso di mucha. Tambe por a conclui cu casi ningun di e instancianan ariba menciona, tin un maneho concreto y uniforme pa anda y/of atende cu e casonan di sospecho di abuso di mucha. DMH, a duna un splicacion amplio riba e 5 pasonan, cu ta delinea den e prome buki di ley articulo 243 (a-d).

E mainta informativo tabata uno bon bishita, caminda a plantia algun scenario concreto como ehempel y con nan por a atende cu esaki. Tambe a haci un intento di colecta algun informacion valioso a base di un analisis di ‘swot’ cu e organisacionnan presente, mencionando nan punto fuerte y menos fuerte. Di e forma aki por cuminsa sondea na un trahamento mas hunto, mirando e importancia di pone derecho di mucha como un punto di salida.

Tambe a bin dilanti un caso (di un tata indocumenta cu a logra sali di Aruba cu su yiu menor sin e permiso di e mama ( tambe indocumenta) caminda a surgi un discusion sano, pa discuti riba e maneho di cada departamento concerni y con nan a uza of keda sin uza nan maneho.

Por ultimo a keda palabra cu lo bay manda un invitacion na cada instancia pa por manda un representante, pa asina por sinta un biaha mas, pa por bin na un convenio concreto y mutuo, caminda lo describi con e organisacionnan concerni lo bay traha hunto di awor en adelante den e casonan di mucha y/of hoben indocumenta na Aruba. E proceso aki mas sigur lo tuma lugar den luna den december y/of januari proximo y cu e meta final pa tin mihor bista riba e bienestar general y proteccion di nos mucha- y hobennan na Aruba.