Team di DMH ta sigui brinda presentacion interactivo cu informacion general di ley di Codigo di Proteccion (CdP), cu e Departamento di Mucha y Hoben (DMH) ta encarga cune.
E mainta a tuma lugar na Biblioteca Nacional di Aruba situa na Playa. Dos Supervisor di Codigo di Traimerdia, Yuneida A. y Geraldine M. a extende e invitacion na team di DMH. Esaki ta debi cu Bureau Traimerdia a finalisa nan protocol y maneho concreto riba e implementacion di Codigo di Proteccion na henter staf di Traimerdia.
DMH a elabora den corto riba e contenido di e ley di CdP y tambe kico ta e 6 categorianan di abuso di mucha, tambe a elabora y splica amplio riba e online toolkit y con esaki por yuda cada profesional.
DMH ta satisfecho y contento cu e participacion activo di e profesionalnan aki, cu ta traha tur dia cu nos muchanan. E remarcanan positivo manera; “dicon a dura asina largo, prome cu CdP a yega cerca nan”, sigur ta hopi positivo, mirando cu nan tin e necesidad y relevancia pa traha cu un plan structural y uniforme.
DMH ta conclui cu e mainta a bay bon y cu e profesionalnan a keda suficiente informa y inspira pa tuma e pasonan adecuado, na momento cu tin un sospecho di abuso di mucha y con nan lo aplica e pasonan di CdP.
