Un hende muhe cu a laga scol, a casa y haya yiu hoben a cambia su bida bayendo scol bek despues di 14 aña. Den e entrevista aki e docente Raquel Lampe ta comparti su storia cu Bon Dia Aruba.

Lampe ta conta cu el a lanta den un famia grandi y artistico. “Mi a lanta den e bario di Savaneta. Nos ta bin di un famia grandi , pues na cas nos ta 6 ruman. Semper mi a gusta Arte, specialmente music y canto. For di chikito mi tabata gusta canta. For di mi 4 aña caba mi ta corda cu mi tabata sconde tras di sofa y canta. Mi tabata un mucha hopi verlegen. Nos a lanta na cas ta aprecia loke cu tin, loke cu nos mayornan por a provee pa nos.” e ta comenta.

Mama hoben
Segun Lampe, su bida a cambia drasticamente na un edad hoben y e mester a sacrifica hopi pa hiba su famia dilanti. “Yegando den pubertad, hopi biaha nos ta tuma desicionnan cu ta menos sabi, pasobra nos ta kere nos sa mihor cu nos grandinan. Asina tambe mi a bira un mama hoben y nos mayornan a yega ne acuerdo cu nos mester a casa. Pues na un edad hopi jong, mi a bira un esposa y mama. Scol ya no tabata e prioridad. Ta parse cu mi futuro tabata ‘doomed’. Sin scol drechi, sin un chens pa bay padilanti, dependiendo di otro hende, asina bida lo tabata pa e resto di mi bida. Na prome instante bo no ta worry mucho. Pero segun cu bo ta crece, segun cu bo famia ta expande, segun cu costo di bida tabata sigui subi, mas y mas e presion tabata yega na mi porta. Mi mester a bay traha pa yuda sostene nos famia. Y asina mi a traha un variedad di trabou, for di trabou di limpiesa. parti corant, cahera, traha den hardware store, y prome cu mi a bira docente mi a traha como asistente y secretaria di Dr. Narain (dfm).”

Bay scol bek
Ora oportunidad yega, bo tin cu tum’e. Esaki ta precisamente locual Lampe a haci. “Despues di mas cu 14 aña cu mi a bandona scol, mi a haya e oportunidad pa bay bek scol. Esaki tabata un desicion grandi cu lo cambia full mi bida. E desicion aki a bira mas y mas cla segun mi tabata puntra pa guia y conseho. Asina mi a tuma e desicion di BAY P’E! Ata’mi na scol, despues di 14 aña cu min tabatin nada mas di haci cu scol. Mi a pusha mi mes, mi a sacrifica hopi cos. Pero tambe mi a soporta hopi cos pa asina logra mi meta. Mi a caba mi estudio como Docente di Arte & Cultura y mi a cuminsa traha. Mi ta asina contento cu mi a tuma e paso aki pa mi mes, cu mi tabata un poco egoista pa asina ami supera y surpasa mi propio expectativa. “

Progreso constante
Di mama hoben, pa docente, pa wordo escogi maestro di aña. Lampe ta spera su storia por inspira otro hende muhe. Despues di a pasa temponan duro, solo a sali y e docenta aki no ta pensa di stop pa awo. “Aña 2011 tabata un aña cu hopi emocion. E aña a habri cu tristesa pero a sera cu alegria. Na luna di April mi a perde mi Tata stima pero na October mi a kede eligi maestro di aña. Esta un honor esey tabata pami. Danki na cada studiante, colega y tur esnan cu a haci esaki posibel. Pero esaki no kiermen cu mi ta stop di siña of stop di pusha mi mes. E aña aki mi a caba un curso na Universidad di Aruba esta Educational Leadership for Collaboration. Esaki ta un logro mas pa mi crecemento personal. Aparte di esaki mi ta mama di 3 yiu y mi ta bendiciona cu un nieta y un nieto cu ta mi amornan di mas dushi. “

Probecha hubentud
E ta finaliza bisando: “ Cu parti di mi storia mi kier encurasha cada persona cu pa un of otro motibo no por a termina nan estudio, cu esaki no kiermen cu bo no por tuma pasonan pa bo propio progreso. Nunca ta laat pa bo siña algo nobo, gara tur oportunidad cu presenta den bida y siña mas tanto posibel. Y na tur hoben, no perde e oprtunidad pa saca e maximo beneficio di bo estudio awo cu bo ta hoben, liber di responsabilidadnan di bida. Uza bo hubentud na un bon forma y na bo propio beneficio, Corda cu den bida bo por perde tur cos material, hasta nos libertad, pero bo conocimento y sabiduria, niun hende por kite dibo. Cada un di nos ta crea nos propio futuro”.