(AP) – DJ conoci internacionalmente David Guetta a haci un cas pa su mes na Persian Gulf.

E DJ Frances ta residente di United Arab Emirates, unda cu el a duna varios precentacion, esun mas reciente riba e veld pa helicopter riba di e gran hotel Burj Al Arab, y tabata un di e prome artistanan invita pa presenta na Saudi arabia ora cu e reino a habri su portanan na turista y a cuminsa permiti concierto y entretenimento. Guetta lo ta dunando un concierto na Saudi Arabia atrobe riba diadomingo.

Guetta a duna presentacion na Saudi Arabia su Formula-E den aña 2018 y un aña despues na e MDLBeast music festival na e capital di Riyadh. Promovi como e region su evento musical mas grandi, e festival a ricibi critica pa causa no a mantene e imagen tradicional di Saudi Arabia. Celebridadnan y influencers tambe a ricibi critica pa causa di promove un pais cu ta hopi acusa di abuso di derechonan humano. Guetta ta haciendo su segundo presentacion na e festival riba diadomingo.

Papiando cu The Associated Press prome cu e dia aki, Guetta a defende su participacion.

“Mi no ta toca pa politico, mi ta toca pa hende, y si mi no por haci esaki, mi lo mester toca solamente na paisnan unda cu mi ta completamente di acuerdo cu e lidernan,” el a bisa desde Louvre Abu Dhabi unda cu e tabata grabando un presentacion cu lo ta parti di un show di aña nobo.

Si e mester ser restringi di cierto pais pa motibonan politico, Guetta a agrega “mi lo probablemente keda cas.”

MDLBeast Soundstorm su prome edicion tabatin presentacion di artista manera J Balvin, Steve Aoki y Guetta entre otronan, mientras cu e edicion di 2021 tin artistanan manera Tiesto, Martin Garrix, Guetta y DJ Snake. Den aña 2019, Instagram y TikTok tabatin potretnan di celebridad, modelo y celebridadnan di red social, tambe conoci como “influencers” publicando den diferente parti di Saudi Arabia.

E publicacionnan a atrae controversia y gruponan di derecho humano a critica e celebridadnan pa promove e pais sin papia tocante su record di derechonan humano. Algun celebridad despues a comenta cu nan a ser paga pa publica tocante e evento. Reportahenan circulando riba rednan social na e tempo aki tabata alega cu algun di nan a ser paga suma hopi halto pa biaha bay e pais.

“Mi no ta bisando loke mi ta bisa paso mi tabata ricibi pago, mi ta ricibi pago den cualkier pais, boso sa cu mi por gana placa na Saudi, na Merca, na Europa, na Latino America,” Guetta a comparti.

“Mi kier tin e habilidad di toca pa hende unda cu mi bay. Pero eora mi no por bay China? Mi lo mester stop di bay Merca pa motibo cu tin biaha, bosa, no ta tur ora mi ta di acuerdo cu cierto guera cu ta tuma luga?”

E festival di musica aki tabata un di e prome eventonan unda cu homber y muhe di Saudi Arabia tabata permiti di baila y comparti hunto den publico.