Gobernador Ricardo Rosselló a informa ayera cu ya el a converti den ley e proposicion cu a elimina e asina yama Comision pa Auditoria di Debe. De paso, el a recalca cu e no ta opone cu ta examina e debe di e isla, pero cu e proceso ey mester tuma luga den e tribunalnan y den e procesonan di mediacion.
E Comision pa Auditoria di Debe a ser crea durante administracion di gobernador Alejandro García Padilla. E ta integra pa representante di institucionnan financiero, cooperativa, academico y sindicato. A forma e comision pa haci auditoria riba debe publico di e pais, cu recientemente ainda ta na nivel di US$ 70.000 miyon.
“Unda ta bay resolve esaki ta den tribunal y si esey no tuma luga, mi no ta opone y lo duna bonbini na cualkier grupo di ciudadano cu ta desea di constitui, cu kier busca e informacion, cu kier haci un reclamo, cu nan por haci esey,” e prome ehecutivo di e pais a expresa. “E proceso aki di auditoria di debe no tin reclamo”, el a argumenta despues di referi na otro pais unda a haci auditoria di debe.
Di otro banda, e gobernador a lamenta e altercado cu a tuma luga diasabra pasa entre manifestante y miembro di polis na banda panort di e Capitolio na momento cu lo a bay debati riba e proyecto di ley cu a deroga e Comision.
Esnan cu tabata protesta a trata di drenta den e sesion pa opone e desaparicion di e Comision.
“Lamentable, ademas, ora tin un situacion di tension pa pueblo di Puerto Rico”, el a señala.
Puerto Rico actualmente ta someti na supervision di Senado Mericano, en busca di un salida pa e debenan astronomico cu e pais conoce. E medidanan di austeridad bao guia di e gobernador nobo, desde inicio di e aña aki, ta lanta bastante malcontento bao diferente gremio.
