Ayera diadomingo tabata e beurt di districto di Noord, na unda CEDE Aruba hunto cu IBiSA y Gobierno di Aruba a cuminsa cu e proyecto Ban Caya, pa asina reactiva e barionan di un manera mas sano pa e muchanan.
For di 3or di atardi te cu 7or di anochi diferente habitantenan tanto di noord como barionan rond a acerca na stadion Frans Figaroa na unda e cayanan y stadion mes tabata yen di muchanan, ambiente y ademas di diferente fundacion cu kier a duna un poco mas di informacion di loke nan ta haci manera Telefon pa Hubentud, Fundacion pa Nos Muchanan, Fundacion Santa Rosa, IBiSA, entre otronan.
E obhetivo di e proyecto Ban Caya ta pa reactiva e barionan, unda nan por pasa un dia cu nan sernan keri y conoce nan bario. E idea ta pa Ban Caya bay na e diferente bario di Aruba, unda cu cada bario ta haya oportunidad di mustra nan residentenan kico nan ta ofrece y ayera e proyecto a cuminsa den e bario di Noord.
Tambe tabatin un gran cantidad di organisacion presente, entre otro, tent di yoga, tent di nutricion, tent di manicure y pedicure, bus di salud y diferente club di deporte cu lo ta haciendo un demostracion.
Algun personanan presenta a mustra positivo pa cu e proyecto na unda algun di nan a señala cu lo ta bon pa e proyecto aki sigui tuma luga varios biaha den aña pa asina activa e barionan manera e meta di esaki ta.
CEDE Aruba a cuminsa cu e proyecto di Barionan Unico pa brinda sosten na e barionan. Barionan Unico ta un proyecto cu ta ricibi sosten di Gobierno di Aruba, di Samenwerkende Fonds en Cariben y di diferente otro fondonan pa colabora hunto cu comunidad pa barionan mas sano.
Igualmente nan a haci un ciclovia no solamente pa actividad fisico sino pa haci henter e comunidad di Noord consciente di kico su bario tin pa ofrece, den e parti di deporte y otro organisacionnan, ademas tabatin demostracion di algun deporte como skate y muchanan a Sali core den nan bais pa disfruta e ambiente ameno di diadomingo atardi.
