Disputa breve involucrando partidonan PPA y Raiz pa uso di color oraño

Despues cu Conseho Electoral a anuncia e color asigna na cada partido politico, tabatin un disputa entre dos partido tocante uso di color oraño. Sinembargo, e disputa a keda resolvi rapidamente.

Diaranson ultimo, Conseho Electoral a tene un sesion durante cual a asigna un number riba stembiljet y un color na cada partido politico cu ta habilita pa participa den eleccion dia 6 di december proximo.

Manera ta conoci, un total di 11 lista di candidato di partidonan politico lo por participa na eleccion di parlamento dia 6 di december y listanan aki ta: ACCION 21 cu Miguel Mansur como e prome candidato riba e lista; AVP cu Wendrick Cicilia como e prome candidato riba e lista; CURPA cu Eric Ras como e prome candidato riba e lista; FUTURO cu Gerlien Croes como e prome candidato riba e lista; LPR cu Ryçond Santos do Nascimento como prome candidato riba e lista; MAS cu Marisol Tromp como e prome candidato riba e lista; MEP cu Evelyn Wever-Croes como e prome candidato riba e lista; HTC cu Gilbert Webb como e prome candidato riba e lista; PPA cu Otmar Oduber como e prome candidato riba e lista; RAIZ cu Ursell Arends como e prome candidato riba e lista; y partido RED cu Ricardo Croes como e prome candidato riba e lista.

E numeracion di e listanan a tuma luga via trekmento di lot. Lider y/of representante di seis partido tabata presente pa trek lot y haya number y color asigna.

Sinembargo, un dia despues, lider di partido PPA, Otmar Oduber, a indica den medionan local cu a entrega un keho cerca Conseho Electoral, pa motibo cu a asigna color “oraño cla” na partido Raiz y “oraño scur” na partido PPA, cu tradicionalmente ta usa e color oraño sin distincion.

Oduber a indica cu e hecho cu tin dos partido riba lista cu color oraño, cu riba dje ta number 2 y number 3 riba stembiljet, por trece confusion cerca e votadornan, ya cu den un color manera oraño no ta facil pa mira un distincion. Den esaki, Oduber a enfatisa cu durante dos eleccion den pasado, Raiz a usa shinishi como nan color. E hecho cu tur dos partido lo usa un color similar por confundi e votador.

Sinembargo, despues di a trata e tema cu Conseho Electoral, e problema a keda soluciona ayera mainta.

Esaki pasobra a pesar cu Conseho Electoral a yama e color otorga na partido Raiz como “oraño cla”, ora di mira e color, esaki ta mas manera un color “peach.” Mientras tanto, e color asigna na partido PPA si ta un color oraño normal. Asina a conclui cu no tin riesgo cu e votadornan lo por confundi entre e partidonan, ya cu riba e stembiljet e colornan ta aparece toch diferente.

Sinembargo, a sugeri pa den futuro, Conseho Electoral duna un nomber na cada color mas specialisa, por ehemplo “peach” en bes di “oraño cla,” pa asina evita cualkier confusion.