(AP) – ‘Moana’ lo bira e animacion mas recien di Walt Disney Co. cu lo ricibi un pelicula cu actornan real, e asina yama ‘live-action’ y por lo menos un di e actornan di bos di e pelicula original lo bolbe back.
Hefe ehecutivo di disney Bob Iger a anuncia cu un ‘live-action’ di Moana ta den desaroyo riba dialuna durante un yamada cu inversionistanan. E produccion ta den su etapanan di comienso y aunke te ainda no a anuncia un director, loke si a reporta ta cu Dwayne Johnson lo bolbe back y interpreta su personahe Maui.
“E storia aki ta mi cultura y e storia aki ta un emblema di nos hendenan su gracia y fortalesa,” Johnson a splica. “Mi ta bisti e cultura aki cu hopi orguyo riba mi curpa y den mi alma y e oportunidad unico aki di reuni cu Maui, ken ta inspira pa e mana y spiritu di mi difunto welo, Hefe Peter Maivia, ta uno cu ta sumamente profundo pami.”
Crea cu inspiracion di mitologia di Polynesia y carga pa canticanan di Lin-Manual Miranda, “Moana” tabata un hit masivo pa Disney den aña 2016, generando un ganashi di 643.3 miyon dollar mundialmente. Auli’i Cravalho, ken a duna su bos pa interpreta Moana den e pelicula original, lo ta un productor ehecutivo den e version nobo aki.
