Despues di e prome evento di Aruba Fashion Week e weekend cu a pasa nos a papia cu Rhona Lemminga, un di e dos diseñadornan local cu a participa e aña aki cu e fin di siman di moda. Nos ta inclui tambe potretnan di e di dos dia di e evento cual a mira 5 coleccion di swimwear di diseñadornan Venezolano.

E diseñador kende tambe ta encarga cu e departamento di moda na EPB ta conta Bon Dia cu e la siña hopi di e experiencia bunita di ta un diseñador local e aña aki den e Aruba Fashion Week. Sra. Lemminga ta spera cu e organisadonan lo sigui haci e evento aki un realidad pasobra ‘e ta duna hopi hende chens pa wak mas di moda di exterior pero tambe local’.

‘Aruba tin talento di calidad pero falta durf’

En particular sra. Lemminga ta haya cu e organisadonan mester sigui busca diseñadornan local pa participa cu e evento aki. “Na Aruba nos tin hopi talento cu ta na mesun nivel di diseñadornan internacional y nos tin di mustra esaki. Loke falta ta durf di participa na un evento manera esaki.”

E diseñador a urgi esunnan cu tin interes pa diseña paña of tambe pa modela pa purba participa cu eventonan manera e Aruba Fashion Week y no tin miedo. E ta subraya cu ‘nunca ta malo participa, si bo keda na cas so bo ta faya’.

Sra. Lemminga ta duna les na e departamento di moda di EPB unda e ta conta nos cu e tin 6 studiante cu ta hopi interesa den bira diseñador. P’esey e docente a invita su studiantenan tambe pa compaña sra. Lemminga na e Aruba Fashion Week unda nan por a mira y experiencia un otro aspecto di bida di un diseñador di moda.

Loke sra. Lemminga ta spera pa futuro ta pa bin mas eventonan manera e Aruba Fashion Week no solamente na fin di aña pero tambe durante transcurso di aña. “Mescos cu e Art Fair mi ta haya ambos evenementosuper bon pero mi ta haya cu durante aña mester bin mas evento artistico.”

E diseñado den futuro tin hopi plannan pa ehecuta, pero e no ta descarta cu e ta bay sigui duna les. ‘Mi ta gusta duna les, mi no por gaña.’, ta loke sra. Lemminga a conta nos. Sinembargo e la expresa cu lo e kier traha riba un show riba television similar na Project Runway pa Aruba, un competencia di diseñadonan di moda cu pa algun tempo tabata popular riba television Norte Americano.

Un di sra. Lemminga su studiantenan, Chantal Conradus, ta conta nos con desde cu e tabata chikito e tabata pinta diseñonan di diferente paña. “Ora cu mi a haya sa cu na EPB tin un programa di diseña modo mi a bay p’e.”, sra. Conradus ta expresa. E hoben kier sigui desaroya su mes profesionalmente den e ramo di diseño.

“Un dia mi lo kier participa cu algo manera un Fashion Week pa mustra cu ami tambe ta na un nivel cu ta mesun halto cu hende di afo y te hasta cu mi por mas.” Pa e hoben e coleccionnan cu a resalta mas entre tur tabata esun di Agatha Ruiz de la Prada y tambe di Rhona Lemminga mes.

Standard di beyesa

Nos a papia tambe cu algun persona cu tabata presente pa e evento y nan a elogia tur e diseñadornan cu a participa. Sinembargo e persona aki a haya cu ‘den mi wowo e miho coleccion tabata di e artista local (Rhona Lemminga) pasobra e calidad tabata masha halto. Niun di e otronan te awo a capta mi manera e coleccion di dje’. Aunke el a haya e evento bunita tin persona cu nos a papia cu ne cu a comenta riba e modelonan cu a participa. “Nan ta mucho flaco”, ta loke un persona a comenta. Esaki segun e ta un standard cu ta cambiando y lo mester cambia den e mundo di moda pasobra ‘e mucha muhenan tin cu practicamente keda sin come’ pa por yega na e standard irealistico di beyesa cu ta wordo exigi di nan.