E organisacion di Sunset Parade no ta contento cu SMAC pa motibo cu nan a wordo confronta cu gastonan enorme, total casi 12.000 florin. Pero analisando e caso, Bon Dia Aruba a ripara cu e minister di Infrastructura Benny Sevinger atrobe a firma pa algo, deviando asina e procedura.

Den casonan di tereno, nos por a mira caba cu sr. Sevinger ta duna aprobacion sin sigui e proceduranan vigente di entre otro su Departamento di Infrastructura (DIP). Den e caso nobo aki, e mandatario a firma un carta di Mario Faro, di e organisacion di Sunset Parada, unda sr. Faro ta pidi pa un donacion di Serlimar pa limpia e ruta. Cu e famoso firma y palabranan cu e minister tambe a uza den e casonan di tereno – ‘dezerzijds akkoord. gaarne uw medewerking’ – el a pidi Serlimar pa duna nan cooperacion.

Sinembargo segun presidente di SMAC, Shannon Henriquez, e no ta bay asina. Na prome instancia e organisacion di Sunset Parade tin un permiso pa un jump up y no un parada. Pero ora nan a bisa e biaha aki cu nan tin mas cu 1000 persona, ya e situacion a cambia, segun sra. Henriquez. “Nos a yama un reunion aden, pasobra ora bo ta papia di un actividad di 1000 persona ariba, bo mester zorg cu bo tin Rode Kruis envolvi, Imsan, cuerpo policial, tur departamento manera Serlimar y DOW cu ta hopi importante pa cera caminda y limpiesa. Ora nos a yama nan, nan a manda mi un potret di un firma cu nan a haya di un minister pa limpiesa. Pero e no ta bay asina. E tin su proceso cu ta cana y director di Serlimar a bisa: no. E no ta bay honra esaki pasobra no ta asina cos ta bay.”

Segun e presidente di parti di SMAC nan a purba di yuda e organisacion. Entre otro pa toch cubri e gastonan di ambulance. “Pasobra nan ni tabatin un presupuesto pa esey. Pero di parti di cuerpo policial, nan si a exigi cu nan permiso mester wordo cambia pa un otro tipo di permiso.” Sra. Henriquez ta splica esaki ta importante pasobra organisando un jump up no ta costa bo algo, pero un parada si. Pa motibo di siguridad y e otro cosnan menciona ariba di ceramento di ruta etc. “Aña pasa nan a traha cu 8 polis, e aña aki ariba 40 polis. Pasobra imagina e parada di mucho Noord mes ta 500 mucha.”

Mal contento
Riba su Facebook, sr. Faro a expresa su mal contento cu SMAC cu mester percura pa actividadnan di carnaval y yuda. Pero nan a wordo confronta cu gastonan halto. Unda e ta specifica cu mester paga pa 60 polis, y ta 25 florin pa ora pa polis. Pues 7500 florin na total. Segun e nan tambe mester a paga e ambulance, cual SMAC awor ta bisa cu nan si a paga esaki. Y e organisacion ta bisa cu nan mester paga finalmente Serlimar aunke nan tin e aprobacion di minister. Gastonan total di casi 12.000 mientras ‘nos kier yuda engrandece nos carnaval’.

Sra. Henriquez ta comenta cu e no ta haya ‘mucho profesional’ cu nan ta divulga ‘informacion interno manera di e gastonan, asina riba Facebook. Pero e ta bisa e diferencia cu e otro actividadnan ta cu nan ta planea y esaki a bay di acuerdo cu gobierno. “E ora tur gastonan ta cay bou di un capa y ta un suma riba 1 miyon. Lastimamente e Sunset Parada no ta cay bou di nos tapa normal. Como cu e tabata un jump up pero finalmente a bira un parada cu si tin gastonan envolvi.”