(AP)—Secretaria di Tesoreria Mericano Janet Yellen a bisa diasabra cu e discusion binidero entre Merca cu China lo aborda un keho grandi di e administracion di Biden cu e modelo economico y practicanan di comercio di Beijing ta pone compania- y trahadornan Mericano den un desbentaha inhusto.
E dos banda lo tene “intercambionan intensivo” riba crecemento economico mas balansa, segun e declaracion publica di Merca despues cu Yellen y vice-premier Chines He Lifeng a tene reunionnan durante dos dia den e ciudad di Guangzhou. Tambe nan a acorda pa cuminsa cu intercambionan riba combatiendo labamento di placa. No tabata inmediatamente claro kico ora y unda e discusionnan lo tuma luga.
Yellen, ken a yega despues na Beijing despues di cuminsa su bishita di cinco dia den un di e centronan di exportacion y industria mas grandi na China, a bisa cu e discusionnan lo crea un structura pa tende e perspectivanan di otro y purba adresa e preocupacionnan di Merca tocante sobrecapacidad di fabricacion na China.
E agencia noticiero oficial di China, Xinhua News, a bisa cu e dos banda acorda pa discuti un variedad di asunto incluyendo crecemento balansa di Merca, China y e economia global como tambe stabilidad financiero, finanzas sostenible y cooperacion den aborda labamento di placa.
Xinhua a bisa cu China a responde completamente riba e asunto di capacidad di produccion, pero e rapport no a provee detayes. China tambe a expresa preocupacion grave tocante comercio Mericano y medidanan economico cu ta limita China, segun e agencia.
E subsidionan di e gobierno Chines y otro apoyo di politica a encurasha fabricantenan di panel solar y EV na China pa inverti den fabricanan, creando hopi mas capacidad di produccion compara cu e mercado domestico por absorba.
E scala masivo di produccion a reduci costo y a causa guera di prijs pa tecnologianan sostenible, cual ta un beneficio pa consumidonan y esfuersonan pa reduci dependencia global riba combustible fossiel. Pero gobiernonan den West ta preocupa cu e capacidad ey lo inunda nan mercado cu exportacionnan barata, menasando trabaonan Mericano y Europeo.
E intercambio riba crecemento balansa y labamento di placa lo tuma luga bao di e framework di economianan existente y gruponan di tarea financiero cu a ser estableci despues cu Yellen a reuni cu He den juli aña pasa.
Yellen a mustra positivo riba e esfuersonan colaborativo pa adresa e preocupacionnan di Merca tocante companianan Chines bendiendo produccion pa Rusia. Reportahe previo di su biahe a caracterisa e preocupacionnan di Merca tocante sobrecapacidad como un posible pretexto pa tarifanan. Den un comentario publica diabierna anochi, Xinhua a skirbi cu e biahe di Yellen ta un bon señal cu e dos economianan mas grandi di mundo ta manteniendo comunicacion, “discutiendo e ‘sobrecapacidad di China’ den e sector di energia limpi ta parce di crea un pretexto pa implementa politicanan pa proteha companianan Mericano.”
Yellen a conta reporteronan cu Merca “lo no descarta” tarifanan pa responde riba e fabricacion extremamente subvenciona di productonan di energia limpi. Merca a haci esfuerso via ordenan legislativo y ehecutivo pa no depende riba cierto tecnologia Chines pa asina crece su capacidadnan di fabricacion domestico. Hopi miembro di e Cas Blanco y Congreso Mericano ta mira e accionnan como importante pa mantene seguridad nacional.
